यूरोपा जो एक हौआ आतंकित करी करहां - कम्युनिज्मा रा हौआ। एस हौवे जो भगाणे कठे पोप होर जार, मेटरनिख होर गीज़ो, फ्रांसिसी उग्रवादी होर जर्मन ख़ुफिया पुलिस – बूढे यूरोपा री सभी शक्तियें पवित्र गठबन्धन बणाई लितिरा।
कुण-जेह एहड़ी विरोधी पार्टी ही जे तेतारे सत्तारूढ़ विरोधियें कम्युनिस्ट बोली के बदनाम नी किती हो। कुण-जेह एहड़ी विरोधी पार्टी ही जेसे पलटुआं आपणे ले ज्यादा अग्गे बधीरी विरोधी पार्टी होर आपणे प्रतिक्रियावादी विरोधियां-दोन्हों पर हे कम्युनिस्ट हुणे रा आरोप लगाई के तिन्हारी भर्त्सना नीं किती हो। एस तथ्य ले दो गल्ला निकल़ाईं। पैहली भई यूरोपा री सभी शक्तियें स्वीकारी लितिरा भई कम्युनिज्म आपु एक शक्ति ही। दूजा भई एभे बक्त आई गईरा भई कम्युनिस्ट खुलेआम पूरी दुनिया रे सामहणे आपणे विचारौ, आपणे उद्देश्या होर आपणी प्रवृतियां जो प्रकाशित करो होर कम्युनिज्मा रे हौवे री एसा नानी-दादी री कहाणी रा पार्टी रे आपणे एक घोषणापत्रा के खात्मा करी देयो। एसा उद्देश्या ले विभिन्न देशा रे कम्यूनिस्ट लन्दना मंझ जमा हुए होर तिन्हें निम्नलिखित घोषणा पत्र, तैयार कितेया जे अंग्रेजी, फ्रांसीसी, जर्मन, इतालवी, फ्लेमिश होर डेनिश भाषा मंझ प्रकाशित कितेया जाणा।
1. बुर्जुआ होर सर्वहारा*
अजही तक आविर्भूत समस्त समाजा रा इतिहास** वर्ग संघर्षा रा इतिहास रैहीरा। स्वतंत्र माहणु होर दास, पेटीशियन होर प्लेबियन, सामन्ती प्रभु होर भूदास, शिल्प संघा रा उस्ताद-कारीगर*** होर मज़दूर-कारीगर-संक्षेपा मंझ उत्पीड़क होर उत्पीड़ित बराबर एकी-दूजे रा विरोध करदे आईरे। स्यों कधी लुहुखुआं, ता कधी प्रकट रूपा के लगातार एकी-दूजे के लड़दे रैहीरे, जेसा लड़ाई रा अंत हर बारी या ता पूरे समाजा रे क्रान्तीकारी पुनर्गठना मंझ, या संघर्तरत वर्गा री बर्बादी मंझ हुईरा।
*बुर्जुआ ले मतलब आधुनिक पूँजीपति वर्गा ले, यानि सामाजिक उत्पादना रे समाना रे स्वामियां, उजरती श्रमा रा उपयोग करने वाल़ेयां ले हा। सर्वहारा ले मतलब आधुनिक उजरती मज़दूरा ले हा, जिन्हा बाले उत्पादना रा स्वयं आपणा कोई सामान नीं हुंदा, इधी कठे स्यों ज्युंदे रैहणे कठे आपणी श्रम-शक्ति बेचणे जो विवश हुआएं। (1888 रे अंग्रेजी संस्करणा मंझ एंगेल्सा री टिप्पणी)
** मतलब सारा लिपिबद्ध इतिहास। 1847 मंझ समाजा रा पूर्व-इतिहास, यानि लिखित इतिहासा ले पैहलका सामाजिक संगठन, सर्वथा अज्ञात था। एता बाद हैक्सटहाउजेने रूसा मंझ भूमि रे सामुदायिक स्वामित्व रा पता लगाया, मोरेरे सिद्ध कितेया भई ये हे से सामाजिक आधार था, जेताके सभी टयूटन जातिएं इतिहास मंझ पदार्पण कितेया, होर सुले-सुले ये प्रकट हुआ भई ग्राम-समुदाय हे भारता ले लेई के आयरलैण्डा तका हर जगह समाजा रा आदि रूप था या रैहिरा हुणा। एस आदिम कम्युनिस्ट समाजा रे आन्तरिक संगठना रा आपणे ठेठ रूपा मंझ सपष्टीकरण मोर्गना री गोत्रा रे असली स्वरूप होर कबीले रे सौगी तेसरे वास्तविक सम्बन्धा री महती खोजा के कितेया गया। एस आदिम समुदाया रे विघटना रे सौगी समाज अलग-अलग होर अन्ततः विरोधी वर्गा मंझ विभेदित हुंदा लगहां। मैं आपणी कताब- (परिवार, निजी सम्पति होर राज्य री उत्पत्ति, दूजा जर्मन संस्करण, स्टुटगार्ट, 1886) बिच इन्हां ग्राम-समुदायां रे विघटना री प्रक्रिया जो दसणे री कोशीश कितीरी। (1888 रे अंग्रेजी संस्करणा मंझ एंगेल्सा री टिप्पणी)
*** गिल्ड-मास्टरा (या शिल्प संघा रा उस्ताद-कारीगर) ले मतलब गिल्डा रे अध्यक्षा ले नीं, तेतारे पूर्ण अधिकार प्राप्त सदस्या ले हा, जेजो गिल्डा रे भीतर मास्टरा रा स्थान प्राप्त था। (1888 रे अंग्रेजी संस्करणा मंझ एंगेल्सा री टिप्पणी)
इतिहासा रे पिछले युगा मंझ आसे लगभग सभ जगहा विभिन्न सामाजिक श्रेणियां मंझ बंढिरे समाजा रा एक पेचीदा ढांचा-सामाजिक जमाता या श्रेणियां री अलग-अलग रूपा मंझ दर्जाबन्दी देखाएं। प्राचीन रोमा मंझ पेटीशियन, नाइट, प्लेबियन होर दास मिल्हाएं। मध्ययुगा मंझ सामन्ती प्रभु, अधीनस्थ जागीरदार, उस्ताद-कारीगर, मज़दूर-कारीगर, भूदास सुझाएं होर लगभग इन्हा सभी वर्गा बिच अधीनस्थ दर्जाबन्दी हुआईं।
आधुनिक बुर्जुआ समाजे, जे सामन्ती समाजा रे ध्वंसा ले पैदा हुईरा, वर्ग विरोध खत्म नीं कितीरा। तिन्ने ता कल्हे पुराणे री जगहा पर नौवें वर्ग, उत्पीड़ना री पुराणी अवस्था री जगहा परा नौवीं अवस्था होर संघर्षा रे पुराणे रूपा री जगहा नौवें रूप खड़े करी दितिरे।
पर होरी युगा री तुलना मंझ आसारे युगा री, बुर्जुआ युगा री विशेषता ये ही भई इन्ने वर्ग विरोध सरल बणाई दितिरेः आज पूरा समाज दो विशाल शत्रु शिविरा मंझ, एकी-दूजे रे खिलाफ खड़े दो विशाल वर्गा मंझ-बुर्जुआ होर सर्वहारा वर्गा मंझ-ज्यादा ले ज्यादा बंढदा जाई करहां।
मध्ययुगा रे भूदासा ले प्रारम्भिक शैहरा रे अधिकारपत्र प्राप्त बर्गर* पैदा हुए थे। इन्हा बर्गरा ले अग्गे चलीके पैहले बुर्जुआ तत्वा रा विकास हुआ।
अमेरिका री खोज होर उतम आशा अन्तरीपा रा रस्ता तोपी लैणे ले उदीयमान बुर्जुआ वर्गा रे प्रसारा कठे नौवां क्षेत्र खुल्ही गया। ईस्ट इण्डीज़ होर चीनी बाज़ार, अमेरिका रे उपनिवेशीकरण, उपनिवेशा रे सौगी व्यापार, विनिमय रे सामान होर माल उत्पादना मंझ आम वृद्धिए वाणिज्य, नौपरिवहन होर उद्योगा जो, होर फलस्वरूप लड़खड़ांदे हुए सामन्ती समाजा मंझ क्रान्तिकारी तत्वा जो, तेजी के विकास करने रा अभूतपूर्व अवसर दितेया।
उद्योगा री सामन्ती प्रणाली, जेता मंझ औद्योगिक उत्पादना पर बन्द शिल्प संघा रा एकाधिकार हुआं था, नौवें बाज़ारा री बधदी हुई ज़रूरता जो पूरी करने कठे एभे भतेरी नीं रैही गईरी थी। इधी कठे एतारी जगहा मैन्युफैक्चरा री प्रथा लेई लैहाईं। शिल्प-संघा रे उस्ताद-कारीगर मैन्युफैक्चरिंग करने वाल़े मध्यम वर्गे धकेली के एक बखौ करी दिते। अलग-अलग निगमित शिल्प-संघा रा श्रम विभाजन प्रत्येक अलग-अलग वर्कशॉपा रे श्रम विभाजना रे अग्गे लुप्त हुई गया।
*स्वतंत्र नागरिक
एस दौरान बजार लगातार बधदे गए होर माला री मांग बी बराबर बधदी गई। एहड़ी दशा मंझ मैन्यूफैक्चरा री प्रथा बी नाकाफी सिद्ध हुंदी लगी। तेबे भाफा होर मशीना रे उपयोगे औद्योगिक उत्पादना मंझ क्रान्ति पैदा करी दिती। इधी कठे अब मैन्युफैक्चरा री जगहा दैत्याकार आधुनिक उद्योगे, होर औद्योगिक मध्यम वर्गा री जगहा औद्योगिक धन्नासेठे, पूरी की पूरी औद्योगिक फौजा रे नेतेयां, आधुनिक बुर्जुआ वर्ग लेई लिती।
आधुनिक उद्योगे विश्व बजारा री स्थापना किती, जेता कठे अमेरिका री खोजे रस्ता साफ करी दितेया था। इन्ने बजारे वाणिज्य, नौपरिवहन होर स्थल संचारा री जबरदस्त उन्नति कीतिरी। एसा उन्नति रा प्रभाव उद्योगा रे विस्तारा पर पईरा, होर जेस अनुपात मंझ उद्योग, वाणिज्य, नौपरिवहन होर रेलवे मंझ वृद्धि हुई, तेस अनुपाता मंझ बुर्जुआ वर्गे उन्नति किती होर तेसरी पूँजी बधी होर तिन्ने मध्ययुगा ले चलीरे सभ वर्ग पृष्ठभूमि मंझ धकेली दिते। आसे देखाहें भई केस तरीके के आधुनिक बुर्जुआ वर्ग आपणे आपा बिच एक लम्बे विकासक्रमा री, उत्पादन होर विनिमया री प्रणालियां मंझ हुईरी कई क्रान्तियां री उपज हा।
बुर्जुआ वर्गा रे विकासा रे हर कदमा सौगी तेस वर्गा री तदनुरूप राजनीतिक उन्नति बी हुई। सामन्ती अभिजाता रे प्रभुत्व काला मंझ से एक उत्पीड़ित वर्ग था, मध्ययुगीन कम्यूना* मंझ से सशस्त्र होर स्वशासित संघ था, किथी (जेहड़ा इटली होर जर्मनी बिच) स्वतन्त्र शैहरी प्रजातन्त्र होर किथी (जिहां फ्रांसा मंझ) राजतन्त्रा री काराधीन तृतीय श्रेणी, बादा बिच मैन्युफैक्चरा री प्रथा रे दौरान तिने अभिजात वर्गा रे प्रतिसन्तुलना रे रूपा मंझ अर्धसामन्ती तत्वा यानि के पूर्ण निरंकुश राजतन्त्रा री सेवा किती होर शक्तिशाली राजतन्त्रा री आधारशीला रा काम कितेया होर आखिरा बिच आधुनिक उद्योग होर विश्व बजारा री स्थापना ले बाद आधुनिक प्रातिनिधिक राज्या मंझ अनन्य रूपा के आपणे कठे पूरा राजनीतिक प्रभुत्व जीती लितेया। आधुनिक राज्य रा कार्यकारी मण्डल पूरे बुर्जुआ वर्गा रे सम्मिलित हिता रा प्रबन्ध करने वाल़ी कमेटी रे अलावा होर कुछ नीं हा।
* फ्रांसा मंझ नवोदित शैहरे आपणे सामन्ती प्रभुआं होर मालका ले स्थानीय स्वशासन होर तृतीय श्रेणी, रे रूपा मंझ राजनीतिक अधिकार जीतणे ले बी पैहले कम्यूना, रा नावं ग्रहण करी लितेया था। इथी, सामान्यतया, बुर्जुआ वर्गा रे आर्थिक विकासा रे सम्बन्धा मंझ इंग्लैण्डा जो होर राजनीतिक विकासा रे सम्बन्धा मंझ फ्रांसा जो लाक्षणिक देश मनया गईरा। (1888 रे अंग्रेजी संस्करणा मंझ एंगेल्सा री टिप्पणी)
इटली होर फ्रांसा रे नगरवासियें आपणे नगर समुदायां जो, सामन्ती प्रभुआं ले स्वशासना रे आपणे प्रारम्भिक अधिकारा जो खरीदी लैणे या छीनी लैणे ले बाद, ये हे नावं दितेया था। (1890 रे जर्मन संस्करणा मंझ एंगेल्सा री टिप्पणी)
बुर्जुआ वर्गे इतिहास बिच बौहत हे क्रान्तिकारी भूमिका अदा कितिरी। बुर्जुआ वर्गे, जिथी बी तेसरा पलड़ा भारी हुआ, तिथी सभ सामन्ती, पितृसतात्मक होर काव्यात्मक सम्बन्धा रा अन्त करी दिता। तिने माहणु रे आपणे “स्वाभाविक बडेयां” सौगी वास्ता रखणे वाल़े कई प्रकारा रे सामन्ती सम्बन्ध निर्ममता के तोड़ी दिते होर नग्न स्वार्था रे, “नकद पैसे-कौड़ी” रे हृद्यशुन्य व्यवहारा रे सिवाय माहणुआं रे बिच कोई दूजा सम्बन्ध बाकी नीं रैहणे दितिरा। धार्मिक श्रद्धा रे स्वर्गोपम आन्दातिरेका जो, वीरोचित उत्साह होर कूपमण्डूकतापूर्ण भावुकता जो, तिने आने-पाई रे स्वार्थी हिसाब-कताबा रे बर्फीले पाणी मंझ डुबोई दितिरा। माहणु रे वैयक्तिक मूल्य तिने विनिमय मूल्य बणाई दितिरे, होर पैहलके अनगिणत अनपहरणीय अधिकारपत्रा द्वारा प्रदत स्वातन्त्रय री जगहा अब तिने एक एहड़े अन्तःकरणशुन्य स्वातन्त्रय री स्थापना कितिरी जेतौ मुक्त व्यापार बोल्हाएं। संक्षेपा मंझ धार्मिक होर राजनीतिक भ्रमजाला रे पीछे लहुखिरे शोषणा री जगहा पर तिने नग्न, निर्लज्ज, प्रत्यक्ष होर पाशविक शोषणा री स्थापना कितिरी।
जिन्हां पेशेयां रे सम्बन्धा मंझ अजही तका लोका रे मना मंझ आदर होर श्रद्धा री भावना थी, तिन्हा सभीरा प्रभामण्डल बुर्जुआ वर्गे खुराटी लितिरा। डॉक्टर, वकील, पुरोहित, कवि होर वैज्ञानिक, सभी जो तिने आपणा उजरती मजदूर बनाई लितिरा।
बुर्जुआ वर्गे पारिवारिक सम्बन्धा रे ऊपरा ले भावुकता रा परदा उतारूआं हाकी दितिरा होर पारिवारिक सम्बन्धा जो कल्हे धन-सम्बन्धा मंझ बदली दितिरा। बुर्जुआ वर्गे दसी दितिरा भई मध्ययुगा मंझ शक्ति रे तिन्हा बर्बर प्रदर्शना रे सौगी-सौगी, जिन्हारी प्रतिगामी लोक इतनी तारीफ करहाएं, अकर्मण्यता होर आलस्य किहां जुड़ीरे थे। तिन्हे हे सभी थे पैहले दसया भई माहणु री क्रियाशक्ति क्या कुछ करी सकहाईं। इन्ने जे जादू करी के दसीरा से मिश्रा रे पिरामिडा, रोमा री जल प्रणाली होर गोथिक गिरजाघरा ले किथी ज्यादा आश्चर्यजनक हा। इन्ने जेहड़े बडे-बडे अभियान आयोजित कितिरे, तिन्हारे साम्हणे पुराणे बक्ता मंझ जातियां रे समस्त निष्क्रमण होर धर्मयुद्ध फीके पई जाहें।
उत्पादना रे औजारा मंझ लगातार क्रान्तिकारी परिवर्तन होर तेतारे करूआं उत्पादना रे संबंधा मंझ, होर सौगी-सौगी समाजा रे सारे सम्बन्धा मंझ क्रान्तिकारी परिवर्तन किते बाजही बुर्जुआ वर्ग जिउंदा नीं रैही सकदा। एताले उल्टा, उत्पादना रे पुराणे तरीकेयां जो जिहां रा तिहां बणाई रखणा पैहलके सभ औद्योगिक वर्गा रे जियुंदे रैहणे री पैहली शर्त थी। उत्पादना मंझ निरन्तर क्रान्तिकारी परिवर्तन, सभ सामाजिक अवस्थावां मंझ लगातार उथल-पुथल, शाश्वत अनिश्चितता होर हलचल-यों चीजा बुर्जुआ वर्गा जो पैहलके सभ युगा ले अलग करहाईं। सभ स्थिर होर जड़ी भूत सम्बन्ध, जिन्हारे सौगी प्राचीन होर पूज्य पूर्वाग्रहां होर मता री एक पूरी श्रृंखला जुड़ीरी हुआईं, मटयाई दिते जाहें, होर सभ नौवें बणने वाले सम्बन्ध जड़ीभूत हुणे ले पैहले हे पुराणे पई जाहें। जे कुछ बी ठोस हा से हवा मंझ उड़ी जाहां, जे कुछ पावन हा से भ्रष्ट हुई जाहां, होर आखिरकार माहणु संजीदा नजरा ले जिन्दगी रे वास्तविक हालाता जो, माहणु-माहणु रे आपसी सम्बन्धा जो देखणे कठे मजबूर हुई जाहां।
आपणे माला कठे बराबर फैल्हदे बजारा री जरूरता रे करूआं बुर्जुआ वर्ग दुनिया रे कुणे-कुणे री खाक छाणहां। से हर जगहा घुसणे जो, हर जगहा पैर जमाणे जो, हर जगह सम्पर्क कायम करने जो बाध्य हुआं।
विश्व बजारा जो आपणे लाभा कठे इस्तेमाल करी के बुर्जुआ वर्गे हर देशा मंझ उत्पादन होर खपता जो एक सार्वभौमिक रूप देई दितिरा। प्रतिगामियां री भावनावां जो गैहरी चोट पौंहचांदे हुए तिने उद्योगा रे पैरा रे थाल्हे ले तेसरा राष्टीय आधार खिसकाई दितिरा जेता पर से खड़ही रा था। पुराणे जमे-जमाये सभ राष्ट्रीय उद्योग या ता नष्ट करी दिते गईरे या नित्यप्रति नष्ट किते जाई करहाएं। तिन्हारी जगहा एहड़े नौवें-नौंवे उद्योग लेई करहाएं, जिन्हारी स्थापना सभी सभ्य देशा रे कठे जिणे-मरणे रा प्रश्न बणी जाहां। तिन्हारी जगहा एहड़े नौवें उद्योग लेई करहाएं ज्यों उत्पादना रे कठे अब सिर्फ आपणे देशा रा हे कच्चा माल इस्तेमाल नीं करदे बल्कि दूरा-दूरा रे देशा ले ल्यांदीरा कच्चा माल इस्तेमाल करहाएं तिन्हारी जगहा एहडे उद्योग लैई करहाएं जिन्हारे उत्पादना री खपत सिर्फ तेस देशा मंझ नीं, बल्कि पृथ्वी रे कुणे-कुणे मंझ हुआईं। तिन्हां पुराणी जरूरता री जगहा, जिन्हौ स्वदेशा री बणीरी चीजा के पूरा कितेया जाहां था, अब एहड़ी नौवी-नौवीं जरूरता पैदा हुई गईरी जिन्हौ पूरा करने कठे दूरा-दूरा रे देसा होर भू-भागा ले माल मंगाणा पौहां। पुराणी स्थानीय होर राष्ट्रीय पृथकता होर आत्मनिर्भरता री जगहा चौतरफा पारस्परिक सम्पर्के, सार्वभौमिक अन्तरनिर्भरते लैई लितिरी। होर भौतिक उत्पादना रे हे साहीं, बौद्धिक कृतियां सार्वभौमिक सम्पत्ति बणी गईरी। राष्ट्रीय एकांगीपन होर संकुचित दृष्टिकोण-दोन्हों हे ज्यादा ले ज्यादा असम्भव हुंदे जाई करहाएं, होर अनेक राष्ट्रीय होर स्थानीय साहित्य ले एक विश्व साहित्य उत्पन्न हुई करहां।
उत्पादना रे सभ औजारा मंझ तीव्र उन्नति होर संचार साधना री विपुल सुविधा रे करूआं बुर्जुआ वर्ग सभ राष्ट्रा जो, इथी तका भई बर्बरा ले बर्बर राष्ट्रा जो बी सभ्यता री परिधी बिच खीची ल्यावहां। तेसरे माला री सस्ती कीमत एक एहड़ा तोपखाना हा जेता रे जरिये से सभ चीनी दीवारा जो ढहाई देहां, होर विदेशियां रे प्रति तीव्र होर घोर घृणा रखणे वाल़ी बर्बर जातियां जो आत्मसमर्पणा कठे मजबूर करी देहां। हरेक राष्ट्रा जो, एस भया ले भई निता तेस लुप्त हुई जाणा, से पूँजीवादी उत्पादन प्रणाली अपनाणे कठे मजबूर करी देहां से तिन्हा जो जेस चीजा कठे मजबूर करहां तेता जो से सभ्यता बोल्हां ताकि स्यों बी आपु बीच सभ्यता कायम करो यानि खुद बुर्जुआ बणी जाओ। संक्षेपा मंझ, बुर्जुआ वर्ग सारी दुनिया जो आपणे हे सांचे मंझ ढाल़ी देहां।
बुर्जुआ वर्गे देहात शैहरा रे अधीन करी दितेया। तिने बौहत बडे-बडे शैहर बसाइरे होर देहाता री तुलना मंझ शैहरा री जनसंख्या बिच प्रचण्ड वृद्धि कितिरी, होर इहां तिने जनसंख्या रा एक बडा भाग देहाती जीवना री जड़ता ले मुक्त कितिरा। जिहां बुर्जुआ वर्गे देहाता जो शैहरा रा आश्रित बणाई दितिरा, तिहां हे तिने बर्बर होर अर्धबर्बर देशा जो सभ्य देशा रा, कृषक राष्ट्रा जो औद्योगिक राष्ट्रा रा, पूरबा जो पश्चिमा रा आश्रित बणाई दितिरा।
आबादी, उत्पादना रे साधन होर सम्पति री बिखरी री अवस्था जो बुर्जुआ वर्ग ज्यादा ले ज्यादा खत्म करदा जाहां। बिखरी री आबादियां तिने एकी जगहा जमा कितिरी, उत्पादना रे साधना रा केन्द्रीकरण कितिरा होर सम्पति जो चन्द लोका रे हाथा मंझ संकेन्द्रित करी दितिरा। राजनीतिक केन्द्रीयकरण एतारा अवश्यम्भावी परिणाम था। ज्यों प्रान्त पैहले स्वतन्त्र या ढीले-ढाले ढंगा के सम्बद्ध थे होर जिन्हारे हित होर कानून, जिन्हारी सरकारा होर कर प्रणालियां अलग-अलग थी, स्यों समुहबद्ध हुई के, एक सरकार, एक विधि-संहिता, एक राष्ट्रीय वर्ग हित, एक सीमा होर कर प्रणाली रे सौगी आज एक राष्ट्र बणी गईरे।
मुश्कला के आपणे एकी शताब्दी रे शासनकाला मंझ बुर्जुआ वर्गे जितनी शक्तिशाली होर प्रचण्ड उत्पादक शक्तियां पैदा कितिरी, तितनी पिछली सभी पीढियां मंझ मिलाई के बी नीं उत्पन्न हुईरी। प्राकृतिक शक्तियां रा माहणु द्वारा वशीभूत कितेया जाणा, मशीना रा उपयोग, उद्योग होर खेतीबाड़ी मंझ रसायना रा प्रयोग, भाफ-नौपरिवहन, रेलवे, बिजली रे तार, सभ महाद्वीपा रा खेती करने लायक बणाया जाणा, नदियां ले नैहरा निकालणा, पूरी आबादियां रा बुझां छूमन्तरा के पैदा हुई जाणा-क्या पिछली शताब्दियां मंझ कोई ये सोची बी सकहां था भई सामाजिक श्रमा रे गर्भा मंझ एहड़ी उत्पादक शक्तियां सुतीरी पईरी?
एस तरहा के आसे देखाहेः उत्पादन होर विनिमया रे स्यों साधन, जिन्हारी बुनियादा पर बुर्जुआ वर्गे आपणा निर्माण कितिरा, सामन्ती समाजा मंझ हे पैदा हुई गए थे। पर उत्पादन होर विनिमया रे इन्हां साधना रे विकासा री एक खास मंजिला परा स्यों अवस्थावां, जिन्हां बिच सामन्ती समाज उत्पादन होर विनिमय करहां था, यानि कृषि होर उद्योगा रा सामन्ती संगठन, या इहां बोला भई स्वामित्व रे सामन्ती सम्बन्धा, नवोन्नत उत्पादक शक्तियां ले बेमेल हुई गए, स्यों बौहत सारी बेडियां बणी गए। तिन्हौ तोड़ी के हाकणा जरूरी हुई गया होर स्यों तोड़ी के हाकी दिते गए।
तिन्हारी जगहा बुर्जुआ वर्गा रे आर्थिक होर राजनीतिक प्रभुत्व होर अनुकूल सामाजिक होर राजनीतिक ढांचे रे सौगी मुक्त होड़े लेई लिती। आज आसारे साम्हणे ठीक एहड़ी हे तरहा री गति हुई करहाईं। उत्पादन, विनिमय होर स्वामित्व रे बुर्जुआ सम्बन्धा सौगी आमानुषिक बुर्जुआ समाज, से समाज जिने बुझां तिलिस्मा ले उत्पादन होर विनिमय रे एहडे विशाल साधन खड़े करी दितिरे, से एक एहडे जादूगरा साहीं हा जिने आपणे जादू रे जोरा के पाताल लोका री शक्तियां सादी ता लितिरी, पर अब तिन्हा जो काबू रखणे मंझ से असमर्थ हा। पिछले कई दशका ले उद्योग होर वाणिज्य रा इतिहास आधुनिक उत्पादक शक्तियां रा उत्पादना री समकालीन अवस्थावां रे खिलाफ, स्वामित्व रे तिन्हा सम्बन्धा रे खिलाफ विद्रोहा रा हे इतिहास हा, जे बुर्जुआ वर्गा होर तेसरे शासना रे अस्तितव री शर्त ही। इथी तिन्हा वाणिज्यिक संकटा री जिक्र करी देणा भतेरा हा, जिन्हारे नियतकालिक आवर्तना ले बुर्जुआ समाजा रे अस्तित्वा री हर बार ज्यादा ले ज्यादा सख्ती के सौगी परीक्षा हुआईं। इन्हां संकटा मंझ ना केवल मौजूदा पैदावार रे हे, बल्कि पैहले ले उत्पन्न उत्पादक शक्तियां रे बी एक बडे भागा जो बक्ता-बक्ता पर नष्ट करी दितेया जाहां। इन्हां संकटा रे बक्त एक महामारी फैल्ही जाहीं जे पिछले सभ युगा मंझ एक बिल्कुल बेतुकी गल्ल समझी जांदी-यानि अतिउत्पादना री महामारी। समाज अचानक आपणे आपा जो क्षणिक बर्बरता री अवस्था मंझ हटीरा पाहां, एहड़ा लगहां भई तेसरे जीवन निर्वाह रे सभ साधन केसकी अकाले या सर्वनाशी विश्वयुद्धे एकबारगी खत्म करी दितिरे, उद्योग होर वाणिज्य नष्ट हुई गईरे प्रतीत हुआएं। होर ये सभ की? इधी कठे भई समाजा मंझ सभ्यता रा, जीवन निर्वाह रे साधना रा, उद्योग होर वाणिज्य रा अतिशय हुई गईरा। समाजा री मौजूदा उत्पादक शक्तियां बुर्जुआ स्वामित्व री अवस्थावां जो अब उन्नत नीं करदी, बल्कि स्यों इन्हा अवस्थावां रे कठे अतीव सशक्त बणी जाहीं, जिन्हारी बेड़ियां मंझ स्यों जकड़ी री हुआईं, होर जिहां हे स्यों इन्हा बेड़ियां जो तोड़ी देहाईं तिहांए स्यों पूरे बुर्जुआ समाजा मंझ अव्यवस्था पैदा करी देहाईं, बुर्जुआ स्वामित्व जो खतरे मंझ पाई देहाईं। बुर्जुआ समाज री अवस्थावां तिन्हा द्वारा उत्पादित सम्पत्ति जो समाविष्ट करने कठे बौहत संकुचित हुई जाहीं। बुर्जुआ वर्ग इन्हा संकटा ले किहां आपणे जो उबारहां? एकी बखौ उत्पादक शक्तियां रे एक बडे भागा जो जबरदस्ती नष्ट करीके होर दूजी बखौ नौवें-नौवें बजारा पर कब्जा जमाई के होर सौगी हे पुराणे बजारा रा होर बी मुकम्मल तौरा पर इस्तेमाल करीके-यानि होर बी बृहत होर विनाशकारी संकटा रे कठे पथ प्रशस्त करीके, होर इन्हा संकटा जो रोकणे री क्षमता जो घटाई के।
जिन्हां हथियारा के बुर्जुआ वर्गे सामन्तवाद मारी रा था, स्यों हे अब बुर्जुआ वर्गा रे खिलाफ मोड़ी दिते जाहें। पर बुर्जुआ वर्गे एहड़े हथियार हे नीं गढ़ीरे जे तेसरा अन्त करी देंघे, बल्कि तिने एहड़े लोक बी पैदा कितिरे ज्यों इन्हा हथियारा रा इस्तेमाल करघे-आधुनिक मज़दूर वर्ग-सर्वहारा वर्ग।
जेस अनुपाता मंझ बुर्जुआ वर्गा रा, यानि पूँजी रा विकास हुआं, तेस अनुपाता मंझ सर्वहारा वर्गा रा, आधुनिक मज़दूर वर्गा रा, तिन्हां श्रमजीवियां रे वर्गा रा विकास हुआं, ज्यों तेबे तका हे जिउंदे रैही सकाहें जेबे तका तिन्हौ काम मिल्हदा रौहो, होर तिन्हौ काम तेबे तका मिल्हां, जेबे तका तिन्हारा श्रम पूँजी मंझ वृद्धि करहां। यों श्रमजीवी, ज्यों आपणे जो अलग-अलग बेचणे कठे लाचार हे, होरी व्यापारिक माला रे साहीं आपु बी माल हे, होर इधी कठे स्यों होड़ा रे उतार-चढ़ावा होर बजारा री हर तेजी-मन्दी रे शिकार हुआएं। मशीना रे विस्तृत इस्तेमाल होर श्रम विभाजना रे करूआं सर्वहारा रे कामा रा वैयक्तिक चरित्र नष्ट हुई गईरा होर इधी कठे ये काम तिन्हारे कठे आकर्षक नीं रैही गईरा। मजदूर मशीना रा पुछल्ला बनी जाहां होर तेसले सभी थे सरल, सभी थे नीरस होर आसानी के अर्जित योग्यता री मांग किती जाहीं। इधी कठे मजदूरा रे उत्पादना पर खर्च लगभग पुर्णतः तेसरे जीवन निर्वाह होर वंश वृद्धि कठे जरूरी समाना तक सीमित रैही गईरा। पर हर माला रा, होर इधी कठे श्रमा रा बी दाम तेसरे उत्पादना मंझ लगीरे खर्चे रे बराबर हुआं। इधी कठे जेस अनुपाता मंझ कामा री अरूचिकरता मंझ वृद्धि हुआईं तेस हे अनुपाता मंझ मज़दूरी घटाईं। ये हे नीं, जेस मात्रा मंझ मशीना रा इस्तेमाल होर श्रम विभाजन बधआं तेस मात्रा मंझ श्रम रा बोझ बी बधदा जाहां, चाहे ये कामा रे घण्टे बधाणे रे जरिये हो या निर्धारित बक्ता बिच मज़दूरा ले ज्यादा काम लैणे या मशीना री रफ्तार बधाणे बगैरा रे ज़रिये।
आधुनिक उद्योगे पितृसतात्मक उस्ताद-कारीगरा री छोटी-जेह वर्कशापा जो औद्योगिक पूँजीपति रे विशाल कारखाने मंझ बदली दितिरा। कारखाने मंझ भरीरे झुण्डा रे झुण्ड श्रमजीवी सैनिका साहीं संगठित किते जाहें। औद्योगिक फौजा रे सपाहियां साहीं स्यों बाकायदा एक दरजावार तरतीबा मंझ बंढीरे अफसरा होर सार्जेण्टा री कमाना मंझ रखे जाहें। स्यों कल्हे बुर्जुआ वर्ग होर बुर्जुआ राज्य रे हे गुलाम नीं हे बल्कि हर दिन, हर घण्टे स्यों मशीना रे, ओवरसियरा रे होर सर्वोपरि खुद बुर्जुआ कारखानेदारा रे गुलाम हुआएं। ये तानाशाही जितना हे ज्यादा खुल्ही के ये घोषित करहाईं भई मुनाफा हे तेसरा लक्ष्य होर उद्देश्य हा, तितनी हे ज्यादा से तुच्छ, घृणित होर कौड़ी हुआईं।
शारीरिक श्रम मंझ जितनी हे प्रवीणता होर मशक्कता री जरूरत कम हुंदी जाहीं यानि जितनी हे आधुनिक उद्योगा मंझ प्रगति हुंदी जाहीं, तितनी हे ज्यादा मर्धा री जगहा जनानेयां लेंदी जाहीं। जिथी तक मज़दूर वर्गा रा प्रश्न हा, आयु होर लिंग भेदा रा कोई विशिष्ट महत्व नीं रैही गईरा। सभ श्रमा रे औज़ार हे-आयु होर लिंगभेदा रे मुताबिक केसी पर कम खर्च बैठहां, ता केसी पर ज्यादा।
कारखानेदारा रा मज़दूरा रे शोषणा रा फिलहाल अन्त हुआ नीं, होर तेजो नकद मज़दूरी मिल्ही नीं कि फौरन बुर्जुआ वर्गा रे बाकी भाग- मकान-मालिक, दुकानदार, गिरवी रखणे वाल़ा महाजन, बगैरा-तेस परा टूटी पौहाएं।
मध्यम वर्गा रे निम्न स्तर-छोटे कारोबारी, दुकानदार, आम तौरा पर किरायाजीवी, दस्तकार होर किसान-यों सभ सुले-सुले सर्वहारा वर्गा री स्थिति बिच पौंहची जाहें। कुछ ता इधी कठे भई जेस पैमाने परा आधुनिक उद्योग चलहां तेता कठे तिन्हारी छोटी जेह पूँजी पूरी नीं पौंदी होर बडे पूँजीपतियां रे सौगी होड़ा बिच से डूबी जाहीं होर कुछ इधी कठे भई उत्पादना रे नौवें-नौवें तरीकेयां रे निकल़ी आउणे रे करूआं तिन्हारे विशिष्टीकृत कौशला रा कोई मूल्य नीं रैही जांदा। इहां आबादी रे सभ वर्गा ले सर्वहारा वर्गा री भर्ती हुआईं।
सर्वहारा वर्ग विकासा री विभिन्न मंजिला ले गुजरहां। जन्म काला ले हे बुर्जुआ वर्गा के तेसरा संघर्ष शुरू हुई जाहां। शुरू मंझा कल्हे-दुकल्हे मजदूर लडहाएं, फेरी एकी कारखाने रे मज़दूर मिली के लड़हाएं, तेबे फेरी एकी उद्योगा रे एक इलाके रे सभ मजदूर एकता करीके तेस पूँजीपति ले मोर्चा लेहाएं जे तिन्हारा सीधा-सीधा शोषण करहां। तिन्हारा हमला उत्पादना री बुर्जुआ अवस्थावां पर नीं हुंदा बल्कि खुद उत्पादना रे औजारा पर हुआं। स्यों आपणी मेहनता रे सौगी होड़ करने वाल़े बाहरा ले मुंगाई रे समाना जो नष्ट करी देहाएं, मशीनां जो चूर करी देहाएं, फैक्टरियां मंझ आग लगाई देहाएं होर मध्ययुगा रे कारीगरा री खोई री हैसियता जो भी के कायम करने री बलपूर्वक कोशिश करहाएं।
एसा अवस्था बिच मज़दूर देशा भरा मंझा बिखरीरे, असम्बद्ध होर आपणी हे आपसी होड़ा रे करूआं बंढ़िरे जन-समुदाय हुआएं। अगर किथकी मिली के स्यों आपणा एक ठोस संगठन बणाई बी लैहाएं ता ये अझी तिन्हारी सक्रिय एकता रा फल नीं, बल्कि बुर्जुआ वर्गा री एकता रा फल हुआं, क्योंकि बुर्जुआ वर्गा जो आपणे राजनैतिक उद्देश्या री पूर्ति कठे पूरे सर्वहारा वर्गा जो गतिशील करना पौहां होर से एहड़ा करने मंझ अझी कुछ बक्ता तक समर्थ बी हुआं। इधी कठे एस अवस्था मंझ सर्वहारा वर्ग आपणे शत्रुआं के नीं बल्कि आपणे शत्रुआं रे शत्रुआं के, निरंकुश राजतन्त्रा रे अवशेषा, भूस्वामियां, गैर-औद्योगिक बुर्जुवा, निम्न-बुर्जुआ के लडहां। इहां, इतिहासा री समस्त गतिविधि रे सुत्र बुर्जुआ वर्गा रे हाथा मंझा केन्द्रित रैहाएं, इहां हासिल कितिरी हर जीत बुर्जुआ वर्गा री जीत हुआईं।
पर उद्योगा रे विकासा रे सौगी-सौगी सर्वहारा वर्गा री संख्या मंझ हे वृद्धि नीं हुंदी, बल्कि से बडी-बडी जमाता मंझा संकेन्द्रित हुई जाहां, तेसरी ताकत बधी जाहीं होर तेजो आपणी एसा ताकता रा ज्यादा ले ज्यादा अहसास हुंदा लगी जाहां। मशीना जेस अनुपाता मंझा श्रमा रे सभ भेदा जो मिटांदी जाहीं होर लगभग सभ जगहा मज़दूरी जो एक हे निम्न स्तरा पर ल्याउंदी जाहीं, तेस अनुपाता मंझ हे सर्वहारा वर्गा री पाँता मंझ कई प्रकारा रे हित होर जीवना री अवस्था ज्यादा ले ज्यादा एकसम हुंदी जाहीं। बुर्जुआ वर्गा री बधदी हुई आपसी होड़ होर तेताके पैदा हुणे वाल़े व्यापारिक संकटा रे करूआं मज़दूरी होर बी अस्थिर हुंदी जाहीं। मशीना मंझ लगातार सुधार, जे निरन्तर तेजी सौगी बधदा जाहां, मजदूरा री जीविका जो ज्यादा ले ज्यादा अनिश्चित बणाई देहां। अलग-अलग मजदूरा होर अलग-अलग पूँजीपतियां री टक्करा ज्यादा ले ज्यादा दो वर्गा रे बीचा री टक्करा री शक्ल लैंदी जाहीं। होर तेबे बुर्जुआ वर्गा रे विरूद्ध मज़दूर आपणे संगठन (ट्रेड यूनियना) बनांदे लगहाएं, मज़दूरी री दरा जो कायम रखणे कठे स्यों संघबद्ध हुआएं, बक्ता-बक्ता पर हुणे वाल़ी इन्हां टक्करा कठे पैहले ले तैयार रहणे रे निमित स्यों स्थायी संघा री स्थापना करहाएं। जिथि तिन्हारी लड़ाई बलवेयां रा रूप धारण करी लैहाईं।
केभे-केभे मज़दूरा री जीत बी हुआईं पर कल्ही वक्ती तौरा पर। तिन्हारी लड़ाइयां रा असली फल तात्कालिक नतीजेयां मंझ नीं, बल्कि मज़दूरा री निरन्तर बधदी हुई ताकता मंझ हा। आधुनिक उद्योगा रे उत्पन्न कितिरे संचार साधनां के, ज्यों अलग-अलग जगहा रे मज़दूरा जो एकी-दूजे रे सम्पर्का मंझ ल्याई देहाएं, एकता रे एस कामा मंझ मदद मिल्हाईं। एकी हे तरहा रे अनगिणत स्थानीय संघर्षा जो केन्द्रीकृत करीके तिन्हौ एक राष्ट्रीय वर्ग संघर्षा रा रूप देणे कठे बस एहड़े हे सम्पर्का री जरूरत हुआईं। पर हरेक वर्ग संघर्ष एक राजनीतिक संघर्ष हुआं। होर एसा एकता जो, जेतौ हासिल करने कठे पुराणे जमाने मंझ यातायाता री घोर असुविधावां रे करूआं मध्ययुगा रे बर्गरा जो सदियां लगी थी, रेला री कृपा के आधुनिक सर्वहारा कुछ हे साला मंझा हासिल करी लैहाएं।
सर्वहारा रा एकी वर्गा रे रूपा बिच संगठन होर फलतः एक राजनीतिक पार्टी रे रूपा मंझ तिन्हारा संगठन तिन्हारी आपसी होड़ा रे करूआं बराबर गडबडी मंझा पई जाहां। पर हर बारी से भी उठ खडा हुई जाहां-पैहले ले बी ज्यादा मज़बूत, दृढ़ होर शक्तिशाली बणीके। खुद बुर्जुआ वर्गा री भीतरी फूटा रा फायदा चकी के से मज़दूरा रे अलग-अलग हिता जो कानूनी तौरा पर बी मनवाई लैहां। इंग्लैण्डा मंझ दस घण्टे रे कामा रे दिना रा कानून इहां हे पारित हुआ था।
पुराणे समाजा रे विभिन्न वर्गा रे बीच टकराव कुल मिलाई के सर्वहारा वर्गा रे विकासा जो कई रूपा के मंझ मदद हे पहुंचाएं। बुर्जुआ वर्ग आपणे जो लगातार संघर्ष बिच फसीरा पांहाः पैहले अभिजात वर्गा रे खिलाफ, फेरी खुद बुर्जुआ वर्गा रे तिन्हा भागा रे खिलाफ, जिन्हारे हित औद्योगिक प्रगति रे प्रतिकूल हुई जाहें होर आखरा बिच विदेशा रे बुर्जुआ वर्गा रे खिलाफ ता हमेशा हे। इन्हां सभ लडाइयां मंझ से सर्वहारा वर्गा ले अपील करने कठे, तिन्हा ले मदद मांगणे कठे होर इहां तिन्हौ राजनीतिक अखाडे मंझ खींची ल्याउणे कठे मजबूर हुआं। इधी कठे बुर्जुआ वर्ग खुद आपणे आप हे सर्वहारा वर्गा जो आपणे राजनीतिक होर सामान्य शिक्षणा रे तत्वा के सम्पन्न करी देहां, यानि तेसरे हाथा मंझ बुर्जुआ वर्गा के लडने रे हथियार थमहाई देहां।
एतारे अलावा, जेहडा जे आसे ऊपरे देखी चुकिरे, उद्योगा री उन्नति रे करूआं, शासक वर्गा रे पूरे के पूरे समूह सर्वहारा री अवस्था मंझा पौंहचाई दिते जाहें, या कमा ले कम तिन्हारे अस्तित्वा री अवस्थावां कठे खतरा पैदा हुई जाहां। यों लोक बी सर्वहारा वर्गा जो ज्ञानोद्दीप्ति होर प्रगति रे नौवें तत्व प्रदान करहाएं।
आखिरा मंझ, वर्ग संघर्ष जेबे निर्णायक घडी रे नेडे पौंहची जाहां तेबे शासक वर्गा मंझ, असलियता मंझ सम्पूर्ण पुराणे समाजा रे अन्दर, हुई रैही री विघटना री प्रक्रिया इतना प्रचण्ड होर प्रत्यक्ष रूप धारण करी लैहाईं भई शासक वर्गा रा एक छोटा जेह हिस्सा तेसले अलग हुई के क्रान्तीकारी वर्गा रे सौगी-तेस वर्गा रे सौगी जेसरे हाथा मंझ भविष्य हुआं- आई मिल्हां। इधी कठे, जिहां पैहलके युगा मंझ सामन्ता रा एक भाग टूटीके बुर्जुआ वर्गा के आई मिल्या था, तिहाएं अब बुर्जुआ वर्गा रा एक हिस्सा होर खास तौरा पर बुर्जुआ विचारका रा एक हिस्सा जिने इतिहासा री समग्र गति जो सैद्धान्तिक रूपा मंझ समझणे रे योग्य स्तरा पर आपु जो पौहंचाई दितिरा, सर्वहारा वर्गा बिच आई के मिली जाहां।
बुर्जुआ वर्गा रे मुकाबले बिच आज जितने बी वर्ग खड़हिरे, तिन्हा सभी मंझ सर्वहारा वर्ग हे असलियता बिच क्रान्तिकारी वर्ग हा। दूजे वर्ग आधुनिक उद्योगा रे साम्हणे ह्रासोन्मुख हुई के आखरकार विलुप्त हुई जाहें, सर्वहारा वर्ग हे तेसरी मौलिक होर विशिष्ट उपज ही।
निम्न मध्यम वर्गा रे लोक-छोटे कारखानेदार, दुकानदार, दस्तकार होर किसान-यों सभ मध्यम वर्गा रे अंशा रे रूपा बिच आपणे अस्तित्वा जो नष्ट हुणे ले बचाणे कठे बुर्जुआ वर्गा ले लोहा लैहाएं। इधी कठे स्यों क्रान्तिकारी नीं, रूढ़िवादी हे। इतना हे नीं, क्योंकि स्यों इतिहासा रे चक्रा जो पीछे बखौ घुमाणे री कोशिश करहाएं, इधी कठे स्यों प्रतिगामी हे। अगर किथी स्यों क्रान्तिकारी हे ता सिर्फ इधी कठे भई तिन्हौ बौहत जल्दी सर्वहारा वर्गा मंझ मिल्ही जाणा, इधी कठे स्यों आपणे वर्तमानौ नीं, बल्कि भविष्या रे हिता री रक्षा करहाएं, आपणे दृष्टिकोणा जो छाडी के स्यों सर्वहारा रा दृष्टिकोण अपनाई लैहाएं।
“खतरनाक वर्ग”, समाजा रा कचरा, पुराणे समाजा रे निम्नतम स्तरा मंझा ले निकल़ीरा होर निष्क्रियता रे कीचड़ा मंझ सड़दा हुआ समुदाय जिथी-तिथी सर्वहारा क्रान्ति री आन्धी बिच पौउआं आन्दोलना मंझ खिंजही सकहां, पर तेसरे जीवना री अवस्था तेजो प्रतिक्रियावादी षडयन्त्रा रे भाडे रे टट्टू रा काम करने कठे कुछ ज्यादा मौजूँ बणाई देहाईं।
सर्वहारा वर्गा री मौजूदा अवस्था मंझ पुराणे समाजा री अवस्थावां रा वस्तुतः एभे नावं-निशाण तका बाकी नीं रैही गईरा। सर्वहारा बाले कोई सम्पत्ति नीं ही, आपणी जनाने होर आपणे बच्चेयां रे सौगी तेसरा जे सम्बन्धा हा से बुर्जुआ पारिवारिक सम्बन्धा ले बिल्कुल हे भिन्न हा। आधुनिक औद्योगिक श्रमे, पूँजी रे आधुनिक जुवे- जे इंग्लैण्ड, फ्रांस, अमेरिका होर जर्मनी, सब जगहा एक हे साहीं हा- तेसरे राष्ट्रीय चरित्रा रे सभ चिन्हा रा अन्त करी दितिरा। कानून, नैतिकता, धर्म- यों सभी तेस कठे बुर्जुआ पूर्वाग्रह मात्र हे, जिन्हारी ओटा मंझ घातक बुर्जुआ हित छिपिरे।
आजा तका जिन्हा-जिन्हा वर्गा रा पलड़ा भारी हुईरा, तिन्हें सभीएं आपणे पैहले ले हासिल दरजे को मज़बूत बनाणे कठे समाजा जो आपणी हस्तगतकरण प्रणाली रे अधीन करने री कोशीश कितिरी। सर्वहारा वर्ग आपणी अजही तका री हस्तगत प्रणाली रा होर तेतारे सौगी-सौगी पैहलकी हस्तगतकरण प्रणाली रा अन्त किते बिना समाजा री उत्पादक शक्तियां रा स्वामी नीं बणी सकदा। सर्वहारा वर्गा बाले बचाणे होर सुरक्षित रखणे कठे आपणा कुछ बी नीं हा, तेसरा लक्ष्य निजी स्वामित्व री पुराणी सभ गरण्टियां होर जमानता जो नष्ट करी देणा हा।
पैहलके सभ ऐतिहासिक आन्दोलन अल्पमता रे आन्दोलन रैहिरे या अल्पमता रे फायदे कठे रैहिरे। पर सर्वहारा आन्दोलन विशाल बहुमता रा, विशाल बहुमता रे फायदे रे कठे हुणे वाल़ा चेतन होर स्वतन्त्र आन्दोलन हा। आसारे वर्तमान समाजा रा सभी थे हेठला स्तर, सर्वहारा वर्ग, शासकीय समाजा री सब उपरली परतौ पलटे बगैर हिली तका नीं सकदा, किहां बी आपु जो ऊपरौ नीं चकी सकदी।
बुर्जुआ वर्गा रे खिलाफ सर्वहारा वर्गा रा संघर्ष, हालांकि सारतत्वा री दृष्टि ले नीं, पर रूपा री दृष्टि ले शुरू मंझ राष्ट्रीय संघर्ष हुआं। हर देशा रे सर्वहारा वर्गा जो, जाहिर हा, पैहले आपणे हे बुर्जुआ वर्गा के निबटणा हुआं।
सर्वहारा वर्गा रे विकासा री सभी थे सामान्य अवस्था रा वर्णन करदे हुए आसे वर्तमान समाजा रे अन्दर कम ज्यादा प्रछन्न रूपा मंझ चलणे वाल़े गृहयुद्धा रा तेस हे बिन्दु तका चित्रण कितिरा जिथी बुर्जुआ वर्गा जो बलपुर्वक उखाड़ी फैंकणा सर्वहारा वर्गा रे शासना रे कठे आधार प्रस्तुत करहां।
अजही तका जेहड़ा जे आसे देखी चुकिरे, हर तरहा रा समाज उत्पीड़क होर उत्पीड़ित वर्गा रे विरोधा पर कायम रैहिरा। पर केसी बी वर्गा रा उत्पीड़न करने रे कठे ये ज़रूरी हा भई तेजो कम ते कम एहड़ी सुविधाएं दिति जाये जेता के होर नीं सही ता, एक गुलाम वर्गा रे रूपा मंझ, से जिउंदा रैही सको। भूदास व्यवस्था रे युगा मंझ भूदासे उन्नति करी के कम्यूना री सदस्यता हासिल करी लिती थी, तिहांए जिहां निम्न-बुर्जुआ सामन्ती निरंकुशता रे जुवे रे थाल्हे बुर्जुआ बणने मंझ सफल हुई गया था। पर आधुनिक मज़दूरा री दशा बिल्कुल उल्टी ही। उद्योगा री उन्नति रे सौगी, ऊपर उठणे री बजाय, से आपु आपणे वर्गा रे अस्तित्वा के कठे जरूरी अवस्था रे स्तरा ले थाल्हे पौंदा जाहां। से कंगाल़ हुई जाहां होर तेसरी मुफलिसी आबादी होर दौलता ले बी ज्यादा तेजी के बधाईं। एहड़ी स्थिति मंझ ये बिल्कुल साफ हुई जाहां भई बुर्जुआ वर्गा अब समाजा रा शासक बणी रैहणे रे होर समाजा पर आपणे अस्तित्वा री अवस्था जो, अनिवार्य नियमा रे रूपा मंझ, लागू करने बिच अयोग्य हे। बुर्जुआ वर्ग शासन करने मंझ अयोग्य हा क्योंकि से आपणे गुलामा जो गुलामी री हालता मंझ जिन्दा रैहणे री गारण्टी देणे मंझ असमर्थ हा, क्योंकि से तेसरे जीवन स्तरा मंझ एहड़ी गिरावट नीं रोकी सकदा जेतारे फलस्वरूप से तेसरी कमाई खाणे री बजाय तेसरा पेट भरने जो मजबूर हुई जाहां। समाज अब बुर्जुआ वर्गा रे मातहत नीं रैही सकदा- दूजे शब्दा मंझ, बुर्जुआ वर्गा रा अस्तित्व अब समाजा के मेल नीं खांदा।
बुर्जुआ वर्गा रे अस्तित्व होर प्रभुत्वा री लाज़िमी शर्त पूँजी रा निर्माण होर वृद्धि ही, होर पूँजी री शर्त ही उज़रती श्रम। उज़रती श्रम पूर्णतया मज़दूरा री आपसी होड़ा पर निर्भर करहां। उद्योगा री उन्नति, जेतौ बुर्जुआ वर्ग अनिवार्यतः अग्रसर करहां, होड़ा रे करूआं उत्पन्न मज़दूरा रे अलगावा री जगहा पर तिन्हारा संसर्गजनति क्रान्तिकारी एका कायम करी देहांई। इहां आधुनिक उद्योगा रा विकास बुर्जुआ वर्गा रे पैरा रे थाल्हे ले तेसा जमीना जो हे खिसकाई देहां जेतारे आधारा पर से उत्पादन करहां होर पैदावारा जो हड़पी लैहां। इधी कठे बुर्जुआ वर्ग सर्वोपरि आपणी क्रब खोदणे वालेयां जो पैदा करहां। तेसरा पतन होर सर्वहारा वर्गा री विजय दोन्हों समान रूपा ले अनिवार्य ही।
2. सर्वहारा होर कम्युनिस्ट
समग्र रूपा मंझ सर्वहारा वर्गा रे सौगी कम्युनिस्टा रा क्या सम्बन्ध हा?
कम्युनिस्ट मज़दूर वर्गा री होरी पार्टियां रे मुकाबले मंझ आपणी कोई अलग पार्टी नीं बनांदे।
समग्र रूपा मंझ सर्वहारा वर्गा रे हिता रे अलावा होर तिन्हाले अलग तिन्हारा कोई हित नीं हा।
स्यों सर्वहारा आन्दोलना जो केसी खास नमूने पर ढालणे या तेतौ खास रूप प्रदान करने कठे आपणा कोई संकीर्णतावादी सिद्धान्त स्थापित नीं करदे।
कम्युनिस्ट होर दूजी मज़दूर पार्टियां मंझ सिर्फ ये अन्तर हा भईः
1. विभिन्न देशा रे सर्वहारा रे राष्ट्रीय संघर्षा मंझ राष्ट्रीयता रे सभ भेदभावा जो छाड़ी के स्यों पूरे सर्वहारा वर्गा रे सामान्य हिता रा पता लगाहें होर तिन्हौ साम्हणे ल्यावाहें।
2. बुर्जुआ वर्गा रे खिलाफ सर्वहारा वर्गा रा संघर्ष जिन्हां विभिन्न मंजला ले गुजरदा हुआ अग्गे बधहां तेता बिच हमेशा होर हर जगहा स्यों समग्र आन्दोलना रे हिता रा प्रतिनिधित्व करहाएं।
इधी कठे एकी बखौ, व्यावहारिक दृष्टि ले, कम्युनिस्ट हर देशा री मज़दूर पार्टियां रे सभी ले उन्नत होर कृतसंकल्प हिस्से हुआएं, एहड़े हिस्से ज्यों होरियां जो अग्गे बधाणे कठे प्रेरित करहाएं, दूजी बखौ, सैद्धान्तिक दृष्टि ले, सर्वहारा वर्गा रे विशाल जन-समुदाया री अपेक्षा स्यों एस अर्था मंझ उन्नत हे भई स्यों सर्वहारा आन्दोलना रे अग्गे बधणे रे रस्ते री, तेतारे हालात होर सामान्य अन्तिम नतीजेयां री सुस्पष्ट समझ रखाएं।
कम्युनिस्टा रा तात्कालीक ध्येय से हे हा जे होरी सर्वहारा पार्टियां रा हा-यानि सर्वहारा जो एकी वर्गा रे रूपा मंझ संगठित करना, बुर्जुआ प्रभुत्वा रा तख्ता पलटणा होर राजनीतिक सत्ता पर सर्वहारा वर्गा रा अधिकार कायम करना।
कम्युनिस्टा रे सैद्धान्तिक निष्कर्ष जगत-सुधारक हुणे रा दम भरने वाल़े एस या तेस माहणु रे ईजाद कितिरे या तोपी निकाल़िरे विचारा या सिद्धान्ता पर कतई आधारित नीं हा।
ये कल्ही मौजूदा वर्ग संघर्षा ले, आसारी हाखियां रे साम्हणे हुई रैहिरी ऐतिहासिक गतिविधि ले उत्पन्न यथार्थ सम्बन्धा री सामान्य अभिव्यक्ति ही। मौजूदा स्वामित्व सम्बन्धा रा उन्मूलन कम्युनिज्मा री कोई लाक्षणिक विशेषता हरगिज नीं ही।
इतिहासा मंझ सभ स्वामित्व सम्बन्ध ऐतिहासिक अवस्थावां मंझ परिवर्तन हुणे पर निरन्तर ऐतिहासिक परिवर्तना रे अधीन रैहीरे।
उदाहरणा कठे, फ्रांसीसी क्रान्तिए बुर्जुआ स्वामित्वा रे हक़ा कठे सामन्ती स्वामित्व नष्ट करी दितेया।
कम्युनिज्मा री लाक्षणिक विशेषत ये नीं ही भई ये स्वामित्वा जो आम तौरा पर खत्म करी देणा चाहां, बल्कि ये ही भई से बुर्जुआ स्वामित्वा जो ख़त्म करी देणा चाहां। पर आधुनिक बुर्जुआ निजी स्वामित्व उत्पादन होर उपजा रे हस्तगतकरणा री तेसा प्रणाली री आखरी होर सभी ले सर्वांगपूर्ण अभिव्यक्ति ही, जे वर्ग विरोधा होर मुट्ठी भर लोका द्वारा बौहता रे शोषणा पर आश्रित हा।
एस अर्था मंझ कम्युनिस्टा रे सिद्धान्ता जो कल्हे एकी वाक्य मंझ इहीं बोल्या जाई सकहाः निजी स्वामित्व रा उन्मूलन।
आसा कम्युनिस्टा पर आरोप लगाया गईरा भई आसे आपु आपणी मेहनता के पैदा कितिरी सम्पति हासिल करने रे माहणु रे अधिकारा रा अपहरण करी लैणा चाहें, जेसा सम्पति रे बारे बिच बोल्या जाहां भई से समस्त वैयक्तिक स्वतन्त्रता, क्रियाशीलता होर स्वामित्वा रा मूल आधार हा।
सख़्त मशक्क़ता के कमाई गइरी, ख़ुद हासिल कितिरी, ख़ुद पैदा कितिरी सम्पति। तुसारा मतलब क्या छोटे दस्तकार होर छोटे किसानी री सम्पति ले हा, स्वामित्व रे तेस रूपा ले हा जे बुर्जुआ रूपा ले पैहले था? तेता जो मिटाणे री कोई ज़रूरत नीं ही उद्योगा रे विकासे पैहले हे तेतारा बौहत-कुछ नष्ट करी दितिरा होर जे कुछ रैहा-सैहा हा, तेतौ बी से ध्याड़ पर ध्याड़ नष्ट करदा जाई करहां। क्या फेरी तुसारा मतलब आधुनिक बुर्जुआ निजी सम्पति ले हा? पर क्या उज़रती श्रम श्रमजीवी कठे कोई सम्पति पैदा करहां? हरगिज नीं। ये ता पूँजी पैदा करहां, यानि एहड़ी सम्पति पैदा करहां जे उज़रती श्रमा रा शोषण करहाईं, होर जेतारे बधणे री शर्त ही ये ही भई से नौवें शोषणा कठे उज़रती श्रमा जो पैदा करदी जाये। आपणे वर्तमान रूपा मंझ स्वामित्व पूँजी होर उज़रती श्रमा रे विरोधा पर कायम ही। आवा, एस विरोधा रे दोन्हों पैहलुआं पर गौर करियें।
पूँजीपति हुणा उत्पादना मंझ कल्हे व्यक्तिगत हे नीं, बल्कि एक सामाजिक हैसियत रखणा हा। पूँजी एक सामूहिक उपज ही, होर समाजा रे कल्हे अनेक सदस्या री संयुक्त कार्रवाई के ही, बल्कि अन्ततोगत्वा समाजा रे सभ सदस्यां री मिली-जुली कार्रवाई के हे एता जो गतिशील कितेया जाई सकहां।
एस तरहा के पूँजी व्यक्तिगत नीं हुई के एक सामाजिक शक्ति ही।
इधी कठे पूँजी जेबे साझा सम्पति बणाई दिती जाहीं, जेबे तेतौ समाजा रे सभ सदस्या री सम्पति रा रूप देई दितेया जहां, तेबे वैयक्तिक स्वामित्व सामाजिक स्वामित्वा बिच नीं बधली जांदा। तेबे स्वामित्वा रा कल्हा सामाजिक रूप बधली जाहां। तेतारा वर्ग रूप मिटी जाहां।
आवा, अब उज़रती श्रमा रे पहलू पर विचार करियें।
उज़रती श्रमा रा औसत दाम न्यूनतम मज़दूरी ही, यानि निर्वाह समाना री से मात्रा, जे मज़दूरा री हैसियता ले मज़दूरा री जिन्दगी क़ायम रखणे कठे बिल्कुल ज़रूरी हो। इधी कठे, उज़रती मज़दूरा जो आपणे श्रमा ले जे कुछ हस्तगत हुआं, से तेसरे अस्तित्वा जो बणाई रखणे होर प्रजनना रे कठे हे भतेरा हुआं। आसे श्रमा री उपजा रे एस व्यक्तिगत हस्तगतकरणा रा अन्त नीं करना चाहंदे, जे मुश्किला के माहणु जीवन क़ायम रखणे होर प्रजनना कठे कितेया जाहां होर जेता मंझ एहड़ी बजता री गुंजाइश नीं हुंदी जेता के दूजे रे श्रमा जो वशीभूत कितेया जाई सके। आसे जेस चीजा जो खत्म करी देणा चाहें से हा एस हस्तगतकरणा रा से दयनीय रूप, जेतारे अन्तर्गत मज़दूर पूँजी बधाणे कठे हे ज़िन्दा रैहां, होर तेजो तेस हदा तक जिन्दा रैहणे दितेया जाहां जेस हदा तक शासक वर्गा रे स्वार्था जो तेसरी ज़रूरत हुआईं।
बुर्जुआ समाजा मंझ जीवित श्रम संचित श्रमा जो बधाणे रा कल्हा एक सामान हा। कम्युनिस्ट समाजा मंझ संचित श्रम मज़दूरा रे जीवना जो व्यापक, सम्पन्न होर उन्नत बनाणे रा सामान हा।
एस तरहा, बुर्जुआ समाजा मंझ वर्तमाना रे ऊपर अतीत हावी हुआं। कम्युनिस्ट समाजा मंझ अतीता रे ऊपर वर्तमान हावी हुआं। बुर्जुआ समाजा मंझ पूँजी स्वतन्त्र ही होर तेतारी वैयक्तिकता हुआईं पर जीवित व्यक्ति परतन्त्र हा होर तेसरी कोई वैयक्तिकता नीं हुंदी।
फेरी बी बुर्जुआ वर्ग बोल्हां भई एसा परिस्थिति जो खत्म करी देणे रा मतलब वैयक्तिकता होर स्वतन्त्रता जो खत्म करी देणा हा। होर ये ठीक हे हा। एता मंझ कोई सन्देह नीं भई आसे बुर्जुआ वैयक्तिकता, बुर्जुआ स्वतन्त्रता होर बुर्जुआ स्वाधीनता जो जड़-मूला ले खत्म करी देणा चाहें।
मौजूदा बुर्जुआ अवस्थावां रे अंतर्गत स्वाधीनता रा अर्थ हा मुक्त व्यापार, मुक्त क्रय-विक्रय।
पर अगर क्रम-विक्रय मिटी जाहां, ता मुक्त क्रय-व्यय बी मिटी जाणा। आसारे पूँजीपतियां री मुक्त क्रय-विक्रय री गल्ला जो, आम स्वाधीनता रे बारे मंझ तिन्हारी सभ ‘बडी-बडी गल्ला’ जो, अगर मध्य युगा रे सीमित क्रय-विक्रया रे या तेस बक्ता रे बन्धना मंझ जकडी रे व्यापारियां रे मुकाबले बिच देखया जाए, ता तिन्हारा कुछ मतलब हुई सकहां पर क्रय-विक्रय उत्पादना री बुर्जुआ अवस्थावां होर आपु बुर्जुआ वर्गा रे कम्युनिस्ट उन्मूलना रे मुकाबले मंझ से निरर्थक हा।
आसे निजी स्वामित्वा जो खत्म करी देणा चाहें, एतौ सुणी के तुसारे रोंगटे खडे हुई जाहें। पर तुसारे मौजूदा समाजा मंझ दसा मंझा ले नौ आदमियां रे कठे निजी स्वामित्व अजही ले हे खत्म हुई चुकीरा, चन्द लोका रे बाले अगर निजी सम्पत्ति हई बी ही ता तेतारा एकमात्र कारण ये हा भई दसा मंझा ले नौ आदमियां बाले से हई हे नीं ही। इधी कठे, तुसे आसारे खिलाफ स्वामित्वा री एहडी व्यवस्था जो खत्म करी देणे री इच्छा रखणे रा आरोप लगाहें जेतारे अस्तित्वा कठे ज़रूरी शर्त ये ही भई समाजा रे अधिकांशा बाले कोई सम्पत्ति नीं हो।
संक्षेपा मंझ तुसारा आरोप ये हा भई आसे तुसारा स्वामित्व ख़त्म करी देणा चाहें। ता ये बिल्कुल ठीक हा। आसे ठीक एहडा हे करना चाहें। तुसारा बोलणा हा भई श्रमा रा जिहां हे पूँजी, मुद्रा या लगाना रे रूपा मंझ-एक एहडी सामाजिक शक्ति रे रूपा मंझ-एक एहडी सामाजिक शक्ति रे रूपा मंझ जेस पर इज़ारेदारी कायम किती जाई सके-रूपान्तरण बन्द हुई जाणा, यानी जिहां हे वैयक्तिक स्वामित्व रा बुर्जुआ स्वामित्व मंझ, पूँजी मंझ रूपान्तरण बन्द हुई जाणा, तिहां हे वैयक्तिक्ता रा लोप हुई जाणा।
तुसा जो ये कबूल करना पौणा भई ‘व्यक्ति’ रा तुसा कठे एक हे अर्थ हा-बुर्जुआ या सम्पत्ति रा बुर्जुआ स्वामी। एस माहणु जो ता जरूर हे खत्म करी देणा चहिए।
कम्युनिज़्म केसी आदमी जो समाजा री उपज हस्तगत करने री शक्ति ले वंचित नीं करदा, से कल्हा एस हस्तगतकरणा रे जरिये दूजेयां रे श्रमा जो वशीभूत करने री शक्ति ले तेजो वंचित करहां।
ये बोल्या गइरा भई अगर निजी स्वामित्वा जो खत्म करी दितेया गया ता सारा कामकाज ठप हुई जाणा होर दुनिया भरा मंझ आलस्य छाई जाणा। एतारे अनुसार ता बुर्जुआ समाजा जो घोर आलस्य रे करूआं ना जाणे कधका रसातला मंझ पौहंची जाणा चहिए था।, क्योंकि एस समाजा रे ज्यों सदस्य मेहनत करहाएं स्यों कुछ नी प्राप्त करदे होर ज्यों प्राप्त करहाएं, स्यों काम नीं करदे। असलियता मंझ ये पूरा तर्क एसा द्विरूक्ति री एक अभिव्यक्ति ही भई अगर पूँजी नीं रैहंगी ता उज़रती श्रम बी नीं रैही जाणा।
भौतिक वस्तुआं रे उत्पादन होर हस्तगतकरणा री कम्युनिस्ट प्रणाली रे सम्बन्धा बिच जे आरोप लगाये जाहें, स्यों हे आरोप तिहांए बौद्धिक रचनावां रे उत्पादन होर हस्तगतकरणा री कम्युनिस्ट प्रणालियां रे सम्बन्धा बिच बी लगाए जाहें। जिहां वर्ग स्वामित्वा रा विलोपन बुर्जुआ वर्गा जो उत्पादना रा हे विलोपन लगहां, तिहाएं वर्ग संस्कृति रा विलोपन तेजो सारी संस्कृति रा विलोपन लगहां।
से संस्कृति, जेतारे विनाशा रे बारे मंझ से इतना रोहां-धोआं, अधिकांश जनता रे कठे महज़ मशीना रे साहीं काम करने रा प्रशिक्षण मात्र हा।
पर आसा के उलझणे ले तेबे तका कोई लाभ नीं हा जेबे तका बुर्जुआ स्वामित्वा रे उन्मूलना रे आसारे इरादे जो तुसे आज़ादी, संस्कृति, कानून बगैरा री आपणी बुर्जुआ धारणावां रे मापदण्डा के नापहाएं, तुसारे विचार आपु हे बुर्जुआ उत्पादन होर बुर्जुआ स्वामित्वा री अवस्थावां री उपज हे, ठीक तिहाएं जिहां तुसारा कानून कल्हे तुसारे वर्गा री इच्छा मात्र हा जेतौ कानून बणाई के तुसे सभीयां रे ऊपर लदी दितिरा, एक एहडी इच्छा जेता रा मूलभूत स्वरूप होर जेतारी दिशा तुसारे वर्गा रे अस्तित्वा री आर्थिक अवस्थावां के निर्धारित हुआईं।
उत्पादन होर सम्पत्ति रे मौजूदा सामाजिक स्वरूप होर उत्पादना रे विकासा रे सिलसिले मंझ उत्पन्न होर विलीन हुणे वाल़े ऐतिहासिक सम्बन्धा जो प्रकृति होर तर्कबुद्धि रे शाश्वत नियमा मंझ रूपान्तरित करने रे कठे अन्ध स्वार्था रा भ्रामक बोध तुसा जो विवश करी देहां- एस भ्रामक बोधा रा शिकार बणे रैहणे बिच तुसे आपणे पूर्ववर्ती शासक वर्गा रे सौगी सहभागी हे। प्राचीन युगा रे स्वामित्व रे सम्बन्धा मंझ जेस चीज़ा जो तुसे सपष्टता के देखाहें, सामन्ती स्वामित्वा रे सम्बन्धा मंझ जेस चीज़ा जो तुसे स्वीकार करहाएं, तेतौ ख़ुद आपणे बुर्जुआ स्वामित्वा रे सम्बन्धा मंझ मंज़ूर करना तुसा कठे निश्चय हे गुनाह हा।
परिवारा रा उन्मूलन। कम्युनिस्टा रे एस कलंकपूर्ण प्रस्तावा ले कट्टरा ले कट्टर आमूल परिवर्तनवादी बी भड़की उठाहें।
मौजूदा परिवार, बुर्जुआ परिवार, केस आधारा पर खड़हीरा? पूँजी परा, निजी फायदे परा। आपणे पूरे विकसित रूपा मंझ एहड़ा परिवार कल्हे बुर्जुआ वर्गा रे बिच पाया जाहां। ये स्थिति आपणा पूरक सर्वहारा वर्गा मंझ परिवारा रे व्यवहारतः अभाव होर बाज़ारू वेश्यावृति मंझ पाहीं. ये पूरक जेबे मिटी जाणा ता सामान्य क्रमा मंझ बुर्जुआ परिवार बी मिटी जाणा, होर पूँजी रे मिटणे रे सौगी-सौगी यों दोन्हो मिटी जाणे।
क्या तुसे आसारे ऊपर ये आरोप लगाहें भई आसे बच्चेयां रा तिन्हारे मावा-बाबा ले शोषण कितेया जाणा बन्द करी देणा चाहें? एस अपराधा जो आसे स्वीकार करहाएं।
पर तुसा बोलणा भई घरेलू शिक्षा री जगहा पर सामाजिक शिक्षा कायम करीके आसे एक अत्यन्त पवित्र सम्बन्धा जो नष्ट करी देहाएं। होर तुसारी शिक्षा। क्या से बी सामाजिक नीं ही होर तिन्हा सामाजिक अवस्थावां ले निर्धारित नीं हुंदी जेता बिच तुसे समाजा रे प्रत्यक्ष या परोक्ष हस्ताक्षेपा के स्कूला बगैरा रे ज़रिये शिक्षा देहाएं? शिक्षा मंझ समाजा रा हस्ताक्षेपा कम्युनिस्टा री ईजाद नीं ही, कम्युनिस्टा ता कल्हे एस हस्तक्षेपा रे स्वरूपा जो बदली देणा चाहें होर शासक वर्गा रे प्रभावा ले शिक्षा रा उद्धार करना चाहें।
जिहां-जिहां आधुनिक उद्योगा री क्रिया के सर्वहारा वर्गा मंझ समस्त पारिवारिक सम्बन्धा री धज्जियां उडदी जाई करहाईं होर मज़दूरा रे बच्चे तिज़ारता रे मामूली सामान होर श्रम रे औज़ार बणदे जाई करहाएं, तिहां-तिहां परिवार होर शिक्षा होर मावा-बाबा होर बच्चेयां रे पुनीत अन्योन्य सम्बन्धा रे बारे बिच बुर्जुआ वर्गा री बकवास होर बी घिनौनी सूझदी लगाहीं।
पर पूरा का पूरा बुर्जुआ वर्ग गल़ा फाड़ी के एकी स्वरा के चिंगी उठहां- तुसा कम्युनिस्टा ता जनानेयां सामुदायिक भोगा री चीज बणाई देणी।
बुर्जुआ आपणी पत्नी जो उत्पादना रे एकी औज़ार रे सिवा होर कुछ नीं समझदा। तिने सुणी रखीरा भई कम्युनिस्ट समाजा मंझ उत्पादना रे औज़ारा रा सामुहिक रूपा मंझ उपयोग हुणा। इधी कठे, स्वभावतः, से एतारे अलावा होर कोई निष्कर्ष नीं निकाल़ी पांदा भई तेस समाजा मंझ सभ चीज़ा रे साहीं औरता बी सभी रे साझा री हुई जाणी।
से सुपने मंझ बी नीं सोची सकदा भई दरअसल मक़सद ये हा भई औरता री उत्पादना रे औज़ारा साहीं स्थिति जो खत्म करी दितेया जाणा। कुछ बी हो, स्त्रियां रे समाजीकरणा रे खिलाफ बुर्जुआ रे सदाचारी आवेशा ले ज्यादा हास्यास्पद दूजी होर कोई चीज़ नीं ही। स्यों ये समझणे रा बहाना करहाएं भई कम्युनिसज़्मा रे अन्तर्गत स्त्रियां रा समाजीकरण खुल्लम-खुल्हा होर ज्यादा ले ज्यादा तौरा पर स्थापित कितेया जाणा। कम्युनिस्टा जो स्त्रियां रा समाजीकरण स्थापित करने री कोई जरूरत नीं ही, क्योंकि ये स्थिति ता लगभग अनादिकाला ले चली आईरी।
आसारे बुर्जुआ वर्गा रे सदस्या जो मज़दूरा री बहू-बेटियां जो आपणी मर्ज़ी रे मुताबिक़ इस्तेमाल करने ले सन्तोष नीं हुंदा, वेश्यावां ले बी तिन्हारा मन नीं भरदा, इधी कठे एकी-दूजे री बीवियां पर हाथ साफ करने मंझ तिन्हौ विशेष आन्नद प्राप्त हुआं।
बुर्जुआ ब्याह असलियता मंझ पत्नियां री साझेदारी री हे एक व्यवस्था ही, इधी कठे कम्युनिस्टा रे खिलाफ़ ज्यादा ले ज्यादा ये हे आरोप लगाया जाई सकहां भई स्यों स्त्रियां जो सर्वोपभोग्यता री मौजूदा ढोंगपूर्ण होर गुप्त प्रथा जो खुल्हा, कानूनी रूप देणा चाहें। कुछ बी हो, गल्ल आपणे आप साफ ही भई उत्पादना री वर्तमान व्यवस्था जेबे खत्म हुई जाणी, तेबे स्त्रियां री तेस व्यवस्था ले उत्पन्न सर्वोपभोग्यता रा यानि खुल्ही होर ख़ानगी, दोन्हों तरहा री वेश्यावृति रा अनिवार्यतः अन्त हुई जाणा।
कम्युनिस्टा पर ये आरोप बी लगाया जाहां भई स्यों स्वदेश होर राष्ट्रीयता जो मटाई देणा चाहें।
मज़दूरा रा कोई स्वदेश नीं हा। जे तिन्हा बाले हया हे नीं तेतौ तिन्हा ले छिनये नीं जाई सकदा। क्योंकि सर्वहारा वर्गा जो सभी ले पैहले राजनीतिक प्रभुत्व प्राप्त करणा हा, राष्ट्रा मंझ प्रधान वर्गा रा स्थान ग्रहण करणा हा, ख़ुद आपणे जो राष्ट्रा रे रूपा मंझ संगठित करणा हा, इधि कठे एस हदा तका से आपु राष्ट्रीय चरित्र रखहां, हालांकि एस शब्दा रे बुर्जुआ अर्था बिच नीं।
बुर्जुआ वर्गा रे विकास, वाणिज्य री स्वाधीनता, विश्व बाज़ार होर उत्पादन प्रणाली मंझ होर तदनुरूप जीवना री अवस्थावां मंझ एकरूपता रे करूआं जनगणा रे राष्ट्रीय भेदभाव होर विरोध दिन पर दिन मिटदे जाई करहाएं। सर्वहारा वर्गा रा प्रभुत्व हुणे पर ये होर बी तेज़ी के मिटणे। सर्वहारा वर्गा रे विस्तारा री पैहली शर्त ये ही भई कम ते कम प्रमुख सभ्य देश मिली के एकी सौगी क़दम चको।
जेस अनुपाता बिच एक माहणु ले दूजे माहणु रा शोषण खत्म हुणा, तेस अनुपाता मंझ एक राष्ट्रा ले दूजे राष्ट्रा रा शोषण बी खत्म हुणा। जेस अनुपाता बिच एक राष्ट्रा रे अन्दर वर्गा रा विरोध खत्म हुणा, तेस हे अनुपाता मंझ राष्ट्रा रा आपसी बैरभाव बी दूर हुणा।
धार्मिक, दार्शनिक होर सामान्यतः विचारधारात्मक दृष्टि ले कम्युनिज्मा रे खिलाफ ज्यों आरोप लगाए जाहें, स्यों एस लायक नीं हे भई तिन्हा पर गम्भीरता रे सौगी विचार कितेया जाये।
क्या ये समझणे कठे डुग्घी अन्तर्दृष्टि री जरूरत ही भई माहणु रे विचार, मत होर तेसरी धारणावां- संक्षेपा मंझ तेसरी चेतना- तेसरे भौतिक अस्तित्वा री अवस्थावां, तेसरे सामाजिक सम्बन्ध होर सामाजिक जीवना रे प्रत्येक परिवर्तना रे सौगी बधलाहीं?
विचारा रा इतिहास एतारे सिवा होर क्या साबित करहां भई जेस अनुपाता मंझ भौतिक उत्पादना मंझ परिवर्तन हुआं, तेस हे अनुपाता मंझ बौद्धिक उत्पादना रा स्वरूप परिवर्तित हुआं। हर युगा रे प्रभुत्वशाली विचार सदा तेसरे शासक वर्गा रे हे विचार रैहीरे।
जेबे लोक समाजा बिच क्रान्ति लयाउणे वाल़े विचारा री गल्ल करहाएं, तेबे स्यों कल्हे एस तथ्य जो व्यक्त करहाएं भई पुराणे समाजा रे अन्दर एक नौवें समाजा रे तत्व पैदा हुई गईरे। होर पुराणे विचारा रा विघटन अस्तित्वा री पुराणी अवस्थावां रे विघटना रे सौगी कदम मिलाई के चलहां।
प्राचीन दुनिया जेस बक्त आपणे आखरी साह गिणी करहाईं थी, तेस समय प्राचीन धर्मां जो ईसाई धर्मे पराभूत कितेया था। जेबे अठारवीं शताब्दी मंझ ईसाई मत तर्कबुद्धिवाली विचारा रे साम्हणे धराशायी हुआ, तेस बक्त सामन्ती समाजे तत्कालीन क्रान्तीकारी बुर्जुआ वर्गा ले आपणी मौता री लड़ाई लड़ी थी। धर्म होर अन्तःकरणा री स्वतन्त्रता री गल्ला ज्ञान जगता मंझ मुक्त होड़ा रे प्रभुत्वा जो हे व्यक्त करहाईं थी।
बोल्या जाणा भई “ ये ठीक हा भई इतिहासा रे विकासक्रमा बिच धार्मिक, नैतिक, दार्शनिक, राजनीतिक होर कानून सम्बन्धी विचार बधलदे आईरे, पर धर्म, नैतिकता, दर्शन, राजनीति होर कानून ता सदा एस परिवर्तना ले बचीरे रैहिरे।
“एतारे अलावा स्वाधीनता, न्याय बगैरा एहड़े शाश्वत सत्य बी हये ज्यों हर सामाजिक अवस्था मंझ समान रूपा ले लागू हुआएं। पर इन्हौ नौवें आधार पर प्रतिष्ठित करने रे बजाय कम्युनिज़्म सभ शाश्वत सत्यां जो ख़त्म करी देहां, से समस्त धर्म होर समस्त नैतिकता जो मिटाई देहां, इधी कठे कम्युनिज़्म विगत इतिहासा रे समस्त अनुभवा रे विपरीत आचरण करहां।“
एस आरोपा रा सारतत्व क्या हा? पिछले हरेक समाजा रा इतिहास वर्ग विरोधा रे विकासा रा इतिहास हा, तिन्हा वर्ग विरोधा रा जिन्हें भिन्न युगा मंझ भिन्न रूप धारण कितेया था।
पर तिन्हें चाहे जे बी रूप धारण कितेया हो, पिछले सभ युगा मंझ एक चीज़ हर अवस्था मंझ मौजूद थी- समाजा रे एक हिस्से ले दूजे हिस्से रा शोषण। इधी कठे ये कोई आश्चर्य री गल्ल नीं ही भई विगत युगा री सामाजिक चेतना अनेकानेक विविधतावां होर विभिन्नतावां रे बावजूद जिन्हा सामान्य रूपा या सामान्य विचारा रे दायरे मंझ गतिशील रैहीरी, स्यों वर्ग विरोधा रे पूर्ण रूपा ले विलुप्त हुणे ले पैहले पूरी तरहा नीं मिटी सकदे।
कम्युनिस्ट क्रान्ति समाजा रे परम्परागत स्वामित्व सम्बन्धा ले एक आमूल विच्छेद हा, फेरी एता मंझ हैरानी क्या भई एसा क्रान्ति रे विकासा रा अर्थ हा समाजा रे परम्परागत विचारा ले आमूल सम्बन्ध विच्छेद?
पर कम्युनिज़्मा रे ख़िलाफ़ बुर्जुआ रे आरोपा री कथा एभे समाप्त किती जाए।
ऊपर आसे देखी आईरी भई मज़दूर वर्गा री क्रान्ति रा पैहला कदम सर्वहारा वर्गा जो ऊपर चकी के शासक वर्गा रे आसना पर बठाणा होर जनवादा कठे हुणे वाल़ी लड़ाई जो जीतणा हा।
सर्वहारा वर्गा आपणा राजनीतिक प्रभुत्व बुर्जुआ वर्गा ले सुले-सुले सारी पूँजी छीनणे कठे, उत्पादना रे सारे औज़ारा जो राज्य, यानि शासक वर्गा रे रूपा बिच संगठित सर्वहारा वर्गा रे हाथा मंझ केन्द्रीत करने कठे होर समग्र उत्पादक शक्तियां मंझ यथाशीघ्र वृद्धि कठे इस्तेमाल करना।
निस्संदेह, शुरू मंझ ये काम स्वामित्व रे अधिकारा पर होर बुर्जुआ उत्पादन प्रणालियां पर निरंकुश हमलेयां रे बिना नीं हुई सकदा; यानि एहड़े उपाया रे बगैर नीं हुई सकदा ज्यों आर्थिक दृष्टि ले अपर्याप्त होर अव्यावहारिक प्रतीत हुआएं, पर ज्यों विकासक्रमा मंझ आपणी सीमा जो लंघी जांघे, पुराणी समाज व्यवस्था रे होर बी गैहन भेदना जो अनिवार्य बणाई देंघे होर ज्यों उत्पादन प्रणाली मंझ पूर्णतया क्रान्ति ल्याउणे रे सामाना रे रूपा मंझ अनिवार्य हुंघे।
निस्सन्देह, अलग-अलग देशा मंझ यों उपाय अलग-अलग हुणे।
फेरी बी थाल्हे दितिरे तरीक़े सभी ले अग्गे बधिरे देशा मंझ आम तौरा पर लागू हुई सकहाएः
1. भूस्वामित्व रा उन्मूलन होर समस्त लगाना रा सार्वजनिक प्रयोजना कठे उपयोग।
2. भारी वर्द्धमान या आरोही आयकर।
3. उतराधिकारा रा उन्मूलन।
4. सभ उत्प्रवासियां होर विद्रोहियां री सम्पत्ति री ज़ब्ती।
5. सरकारी पूँजी होर पूर्ण एकाधिकारा ले सम्पन्न राष्ट्रीय बैंका द्वारा राज्य रे हाथा मंझ उधारा रा केन्द्रीकरण।
6. संचार होर यातायाता रे सामाना रा राज्य रे हाथा मंझ केन्द्रीकरण।
7. राजकीय कारखाने होर उत्पादना रे औज़ारा रा विस्तार करना; एक आम योजना बणाई के परती ज़मीना जो जोतणा होर ख़ेती री ज़मीना रा सामान्यतः सुधार करना।
8. हरेका कठे काम करना समान रूपा ले अनिवार्य कितेया जाणा। खासकर कृषि कठे औद्योगिक सेना कायम करना।
9. कृषि रे सौगी मैन्युफ़ैक्चरिंग उद्योगा रा संयोजन; सुले-सुले देहाता होर शैहरा रा अन्तर मिटयाई देणा।
10. सार्वजनिक पाठशाला मंझ सभ बच्चेयां कठे मुफ्त शिक्षा व्यवस्था। वर्तमान रूपा मंझ कारखानेयां मंझ बच्चेयां ले काम लैणा खत्म करी देणा। शिक्षा होर औद्योगिक उत्पादना रा संयोजन, बगैरा।
विकासक्रमा मंझ जेबे वर्गा रे भेद मिटी जाणे होर सारा उत्पादन पूरे राष्ट्रा कठे एकी विशाल संघ रे हाथा मंझ संकेन्द्रित हुई जाणा, तेबे सार्वजनिक सत्ता आपणा राजनीतिक रूप खोई देणा। राजनीतिक सत्ता, एस शब्दा रे असली अर्था मंझ, एक वर्गा ले दूजे वर्गा रा उत्पीडन करने री संगठित शक्ति हे ही। बुर्जुआ वर्गा रे खिलाफ आपणे संघर्षा रे दौरान, परिस्थितियां ले मजबूर हुई के सर्वहारा जो अगर आपणे जो एकी वर्गा रे रूपा मंझ संगठित करना पौहां, अगर क्रान्ति रे ज़रिये से आपणे आपा जो शासक वर्ग बणाई लैहां, होर इहां से उत्पादना री पुराणी अवस्थावां रा बलपूर्वक अन्त करी देहां, ता तिन्हां अवस्थावां रे सौगी-सौगी से वर्ग विरोधा रे अस्तित्व होर आम तौरा पर ख़ुद वर्गा री अवस्थावां रा ख़ात्मा करी देहां होर इहां से एक वर्गा रे रूपा मंझ आपु आपणे प्रभुत्वा रा बी ख़ात्मा करी देहां।
तेबे वर्ग होर विरोधा ले बिन्हिरे पुराणे समाजा री जगहा पर एक एहड़े संघा री स्थापना हुणी जेता मंझ व्यष्टि रा स्वतन्त्र विकास समष्टि रे स्वतन्त्र विकासा री शर्त हुणी।
3. समाजवादी होर कम्युनिस्ट साहित्य
1. प्रतिक्रियावादी समाजवाद
क. सामन्ती समाजवाद
फ्रांस होर इंग्लैण्डा रे अभिजाता री ऐतिहासिक स्थिति एहड़ी थी भई आधुनिक बुर्जुआ समाजा रे खिलाफ़ पैम्फलेट लिखणा तिन्हारा धन्धा बणी गया। जुलाई 1830 री फ्रांसीसी क्रान्ति मंझ होर इंगलैण्डा रे सुधार आन्दोलना मंझ यों अभिजात भी के इन्हा घृणास्पद नवप्रतिष्ठित अनभिजाता ले पराभूत हुए। एता ले बाद कोई महत्वपूर्ण लड़ाई लड़णे री सम्भावना नीं रैही गई। कल्हे साहित्यिक लड़ाई हे एभे सम्भव थी। पर साहित्य रे क्षेत्रा मंझ बी पुनर्स्थापन काला* रे पुराणे नारेयां रा प्रयोग असम्भव हुई गया था।
लोका री सहानुभूति हासिल करने कठे इन्हा अभिजाता जो बाहरी रूपा ले आपणे हिता जो हाखियां ले ओझल करणा पया होर कल्हे शोषित मज़दूर वर्गा रे हिता जो लेई के तिन्हें बुर्जुआ वर्गा रे खिलाफ आपणा अभियोग पत्र तैयार कितेया। अभिजात वर्गे आपणे नौवें प्रभु रे खिलाफ विद्रूपात्मक रचनावां लिखी के होर तेसरे काना मंझ तेसरे आउणे वाल़े सर्वनाशा री भयानक भविष्योक्तियां फुसफुसाईके तिन्हा ले आपणा बदला लितेया।
सामन्ती समाजवादा री उत्पत्ति एस तरहा के हुईः कुछ रोणा-धोणा, कुछ विद्रूपात्मक रचनावां रे तीर चलाणा; कुछ अतीता जो प्रतिध्वनित करना, कुछ भविष्य रा डर दसणा; कधी-कधी आपणी कटु व्यंग्यपूर्ण होर पैनी आलोचना के बुर्जुआ वर्गा रे मर्मस्थला पर चोट पौहंचाणा; पर आधुनिक इतिहासा री प्रगति जो हृद्यंगम करने मंझ आपणी सम्पूर्ण असमर्थता रे करूआं आपणे प्रभावा मंझ सदा हास्यास्पद रैही जाणा।
• इंग्लैण्डा मंझ 1660 ले 1689 रा पुनर्स्थापना काल नीं, बल्कि फ्रांस मंझ 1814 ले 1830 रा पुनर्स्थापन-काल। (1888 रे अंग्रेजी संस्करणा बिच एंगेल्सा री टिप्पणी)
जनता जो आपणे बखौ करने कठे इन्हें अमीर-अमरेयां सर्वहारा री भीखा री झोल़ी जो आपणा झण्डा बणाया। पर जेबे-जेबे जनता इन्हारे सौगी हुई, तेसे इन्हारे कुल्हेयां पर सामन्ता रे वंश-चिन्हा रे ठप्पे हे लगीरे देखे, होर से हासी रे जोरदार होर तिरस्कारपूर्ण ठहाकेयां रे सौगी तिन्हौ छाडी के चली गई।
फ्रांसीसी लेजिटिमिस्टा रे एकी हिस्से होर तरूण इंग्लैण्डे, एहड़ा हे नज़ारा पेश कितेया।
ये बोल्दे बक्त भई तिन्हारे शोषणा रा तरीका बुर्जुआ वर्गा रे शोषणा रे तरीके ले भिन्न था, सामन्तवादी भूली जाहें भई जिन्हा परिस्थितियां होर अवस्थावां मंझ स्यों शोषण करहाएं थे, स्यों बिल्कुल भिन्न थी होर एभे पुराणी पई चुकीरी। ये साबित करदे बक्त भई तिन्हारे शासना मंझ आधुनिक सर्वहारा वर्गा रा कोई अस्तित्व नीं थी, स्यों भूली जाहें भई आधुनिक बुर्जुआ वर्गा तिन्हारी ही सामाजिक व्यवस्था री अनिवार्य सन्तान ही।
कुछ बी हो, आपणी आलोचना रे प्रतिक्रियावादी स्वरूपा जो स्यों इतना कम लकोआएं भई बुर्जुआ वर्गा रे खिलाफ़ तिन्हारा सबी ले बडा इल्ज़ाम ये हुआं भई बुर्जुआ शासना मंझ एक एहड़ा वर्ग पनपी रैहिरा जेस पुराणी समाज व्यवस्था समूल उखाड़ी फैंकणी।
बुर्जुआ वर्गा जो तिन्हारा उलाहना एसा गल्ला कठे इतना नीं हा भई से सर्वहारा वर्गा जो उत्पन्न करी करहां, जितना एसा गल्ला कठे भई से क्रान्तिकारी सर्वहारा वर्गा जो जन्म देई करहां।
इधी कठे, आपणे राजनीतिक व्यवहारा मंझ स्यों मज़दूर वर्गा रे ख़िलाफ़ प्रयोग किति जाणे वाल़ी सभ दमनकारी कार्रवाइयां रा समर्थन करहाएं, होर आपणी बडी-बडी डींगा रे बावजूद रोज़मर्रा रे जीवना मंझ उद्योगा रे कल्पवृक्षा ले पईरे सोने रे फला जो बीनणे कठे होर ऊन, चुकन्दरा री चीनी होर आलू री बणीरी स्पिरिटा रे व्यापारा कठे स्यों सत्य, प्रेम होर सम्माना रा सौदा करने कठे सदैव तैयार रैहाएं।*
* ये मुख्यतया जर्मनी पर लागू हुआं, जिथी भूसम्पतिधारी अभिजात होर युंकर आपणी ज़मीना रे बौहत बडे हिस्से पर आपणे बखा ले गुमाश्तेयां ले काश्त करवाहें होर, एतारे अलावा, बडे पैमाने पर चुकन्दरा ले चीनी होर आलू ले स्पिरिट बनाणे रा बी धन्धा करहाएं। ब्रिटेना रे ज्यादा धनी अभिजात अजही एसा हदा तका नीं गिरिरे पर स्यों बी जाणहाएं भई किहां न्यूनाधिक संदिग्ध ज्वाइंट स्टाक कम्पनियां रे प्रवर्तका मंझ आपणा नावं देई के लगाना री घटदी हुई आमदनी जो पूरा कितेया जाए। (1888 रे अंग्रेज़ी संस्करणा मंझ एंगेल्सा री टिप्पणी)
जिहां पादरी होर ज़मींदारा रा चोली-दामना रा साथ रैहीरा, तिंहाए ईसाई समाजवाद होर सामन्ती समाजवाद दोन्हों जन्मा रे साथी हे। ईसाइयां री वैराग्य भावना जो समाजवादा रा रंग देई देणे ले ज्यादा आसान काम दूजा नीं हा। क्या ईसाई धर्म निजी स्वामित्व, ब्याह होर राज्य रे खिलाफ़ फतवे नीं देंदा रैहीरा? इन्हा चीज़ा रे बदले क्या तिने दानपुण्य होर गरीबी, ब्रह्मचर्य होर शारीरिक तप, मठ-निवास होर मातृ गिरजाघरा री शरण लैणे रा उपदेश नीं दितिरा? ईसाई समाजवाद कल्हा से पवित्र जल हा जेतारे छींटे मारी के पादरी अमीर-उमरा रे सन्तप्त हृद्यां रा पवित्रीकरण करहां।
(ख) निम्न-बुर्जुआ समाजवाद
सामन्ती अभिजात वर्ग कल्हा वर्ग नीं हा जे बुर्जुवा वर्गे बरबाद कितेया, से हे एकमात्र वर्ग नीं हा जेसरे अस्तित्वा री अवस्थावां आधुनिक समाजा रे वातावरणा बिच घुटी के रैही गईरी होर दम तोड़ी चुकीरी। मध्ययुगा रे बर्गर होर छोटे किसान भूस्वामी आधुनिक बुर्जुआ वर्गा रे पूर्वज थे। तिन्हां देशा मंझ, ज्यों उद्योग होर वाणिज्य री नज़रा ले अल्पविकसित हे, यों दोन्हों वर्ग अजही बी उदीयमान बुर्जुआ वर्गा रे सौगी पनपी करहाएं।
तिन्हा देशा मंझ जिथी आधुनिक सभ्यता रा पूरा विकास हुई चुकीरा, निम्न-बुर्जुआ वर्गा रा एक नौवां वर्ग बणी गईरा जे सर्वहारा वर्ग होर बुर्जुआ वर्गा रे बीच झूलदा रैहां होर बुर्जुआ समाजा रे एक पूरक अंगा रे रूपा मंझ सदा आपणा नवीनीकरण करदा रैहां। पर होड़ा री चक्की मंझ पिसी के एस वर्गा रे अलग-अलग सदस्य टूटी-टूटी के बराबर सर्वहारा वर्गा मंझ शामिल हुंदे जाएं होर आधुनिक उद्योगा रा विकास हुणे रे सौगी स्यों तेस क्षणा जो बी नेडे आउंदा देखाएं जेबे आधुनिक समाजा रे एक स्वतन्त्र अंगा रे रूपा मंझ तेसरा बिल्कुल खात्मा हुई जाणा और उद्योग, खेती होर वाणिज्य रे क्षेत्रा मंझ ओवरसियरा, नाज़िरा होर दुकान-कर्मचारियां तिन्हारी जगहा लेई लैणी।
फ्रांसा साहीं देशा मंझ, जिथी आधी ले ज्यादा आबादी किसाना री ही, ये स्वाभाविक था भई जे लेखक बुर्जुआ वर्गा रे ख़िलाफ़ सर्वहारा वर्गा रा साथ देहाएं थे, स्यों बुर्जुआ शासन व्यवस्था री आपणी आलोचना मंझ किसाना होर निम्न-बुर्जुआ वर्गा रे मानदण्डा रा प्रयोग करदे होर मज़दूर वर्गा रे समर्थना मंझ इन्हां मध्यम वर्गा रे दृष्टिकोणा ले आवाज़ उठादें। निम्न-बुर्जुआ समाजवादा री उत्पत्ति इहां हुई। कल्हे फ्रांसा बिच हे नीं, बल्कि इंग्लैण्डा मंझ बी एस मता रे नेता सिसमोन्दी थे।
समाजवादा री एसा शाखा रे अनुयायियें आधुनिक उत्पादना री अवस्थावां रे अन्तर्विरोधा रा बौहत हे बरीकी सौगी विश्लेषणा किता। अर्थशास्त्रियां री ढोंगपूर्ण वक़ालता रा तिन्हें पर्दाफ़ाश कितेया। मशीना रे उपयोग होर श्रम विभाजना रे विनाशकारी परिणामा, पूँजी होर भूमि रा मुट्ठीभर लोका रे हाथा मंझ संकेन्द्रति हुणा, अति-उत्पादन होर संकट, इन्हा सभी जो तिन्हें अकाटय रूपा के प्रमाणित कितेया, तिन्हें निम्न-बुर्जुआ वर्गा होर किसाना री बरबादी री अवश्यम्भाविता, सर्वहारा वर्गा री दुर्दशा, उत्पादना मंझ अराजकता, माना रे वितरणा मंझ घोर असमानता, एकी-दूजे जो ख़त्म करी देणे कठे राष्ट्रा रे बीच औद्योगिक युद्ध, पुराणे नैतिक बन्धना ले विच्छेदन, पुराणे पारिवारिक सम्बन्धा होर पुराणी जातियां रे विघटना बखौ इशारा कितेया।
पर आपणे सकारात्मक उद्देश्यां मंझ एस तरहा रा समाजवाद या ता ये चाहां भई उत्पादन होर विनमय रे पुराणे साधनां जो होर तेता सौगी पुराणे सम्पत्ति सम्बन्धा जो होर पुराणे समाजा जो भी के क़ायम करी दितेया जाए, या उत्पादन होर विनिमय रे आधुनिक साधना जो तिन्हां पुराणे सम्पत्ति सम्बन्धा रे शिकंजे मंझ कसी दितेया जाए ज्यों तिन्हें तोड़ी दिते थे होर जिन्हारा इन्हां साधना रे ज़रिये टूटणा अनिवार्य था। हर सूरता मंझ ये समाजवाद प्रतिक्रियावादी होर कल्पनावादी दोन्हों हा।
एसरे अन्तिम शब्द हेः उद्योगा जो चलाणे कठे निगमित शिल्पसंघ बणाये जायें होर खेती मंझ पितृसत्तात्मक सम्बन्ध क़ायम हों।
आखरा बिच जेबे काठे ऐतिहासिक तथ्यां तिन्हारा आत्मवंचना रा नशा उतारी दिता, ता समाजवादा रा ये रूप ख़ुमारी रे दौरे मंझ ख़त्म हुई गया।
(ग) जर्मन या “सच्चा” समाजवाद
फ्रांसा रा समाजवादी होर कम्युनिस्ट साहित्य, से साहित्य जे सत्तारूढ़ बुर्जुआ वर्गा रे दबाबा मंझ पैदा हुआ था, होर जे तेसरे ख़िलाफ़ हुणे वाल़े संघर्षा री अभिव्यक्ति था, जर्मनी मंझ तेस बक्त ल्यांदा गया जेबे तेस देशा मंझ सामन्ती निरंकुशता रे ख़िलाफ़ तिथी रे बुर्जुआ वर्गे अजही आपणी लड़ी शुरू हे कितिरी थी।
जर्मनी रे दार्शनिके, अधकचरे दार्शनिके होर बुद्धिविलासियें ये साहित्य बडी उत्सुकता रे सौगी अपनाया। स्यों कल्हे ये भूली गये भई जेबे ये साहित्य फ्रांसा ले जर्मनी आया था ता तेतारे सौगी फ्रांसा री सामाजिक परिस्थितियां नीं आई थी। जर्मनी री सामाजिक अवस्थावां रे सम्पर्का मंझ एस फ्रांसीसी साहित्ये आपणा सारा तात्कालिक व्यवहार खोई दितेया होर विशुद्ध साहित्यिक रूप ग्रहण करी लितेया। उठाहरवीं शताब्दी रे जर्मन दार्शनिका री नज़रा मंझ पैहली फ्रांसीसी क्रान्ति री मांगा “व्यावहारिक तर्कबुद्धि” री सामान्य मांगा ले अलाव होर कुछ नीं थी होर क्रान्तिकारी फ्रांसीसी बुर्जुआ वर्गा री इच्छा री अभिव्यक्ति तिन्हारी दृष्टि बिच शुद्ध इच्छा, अपरिहार्य इच्छा, सामान्यतः सच्ची मानवीय इच्छा रे नियमा री द्योतक थी। जर्मन साहित्कारा रा एकमात्र काम ये था भई स्यों फ्रांसा रे इन्हां नौवें विचारा रा आपणे प्राचीन दार्शनिक विवेका रे सौगी सामंजस्य स्थापित करने, या इहां बोला भई आपणे दार्शनिक दृष्टिकोणा जो छाडे बाजही इन्हां फ्रांसीसी विचारा जो अपनाई लैणा।
अपनाई लैणे रा ये काम तिहां हे पूरा कितेया गया जिहां केसी बी विदेशी भाषा जो आत्मसात कितेया जाहां, यानि अनुवादा रे जरिये।
सुविदित हा भई मठवासी केस तरहा के तिन्हां पाण्डूलिपियां रे ऊपर, जिन्हां मंझ प्राचीन मूर्तिपूजका री क्लासिकी रचनावां लिखीरी थी, कैथोलिक सन्ता री फूहड जीवनियां लिखी करहाएं थे। जर्मन साहित्यकारे अपवित्र फ्रांसीसी साहित्य रे सम्बन्धा बिच ये प्रक्रिया उल्टी दिती। आपणी दार्शनिक बकवासा जो तिन्हें मूल फ्रांसीसी कृतियां री पुश्ता पर लिखेया। उदाहरणा कठे, मुद्रा री आर्थिक क्रियावां री फ्रांसीसी आलोचना री पुश्ता पर तिन्हें लिखेया “मानवता रा विच्छेद” होर बुर्जुआ राज्य री फ्रांसीसी आलोचना री पुश्ता पर “ सामान्य प्रवर्गा रा सत्ताच्युत कितेया जाणा’ बगैरा, बगैरा।
फ्रांसीसी ऐतिहासिक समालोचना री पुश्ता पर इन्हां दार्शनिक उक्तियां री प्रस्तावनावां जो तिन्हें “कर्म दर्शन”, “सच्चा समाजवाद”, “समाजवादा रा जर्मन विज्ञान”, “समाजवादा रा दार्शनिक आधार”, बगैरा भारी-भरकम नावं दिते।
इहां फ्रांसीसी समाजवादी होर कम्युनिस्ट साहित्य बिल्कुल शक्तिहीन बणाई दितेया गया। होर, क्योंकि जर्मना रे हाथा मंझ पई के तिने एकी वर्गा रे विरूद्ध दूजे वर्गा रे संघर्षा जो अभिव्यक्त करना छाड़ी दितेया, इधी कठे तिन्हौ एहड़ा बोध हुआ भई तिन्हें फ्रांसीसी एकांगीपना, परा काबू पाई लितेया होर सच्ची आवश्यकतावां री नीं, बल्कि सच्चाई री आवश्यक्तावां रा प्रतिनिधित्व कितेया; सर्वहारा वर्गा रे हिता रा नीं, बल्कि मानव स्वभावा रे हिता रा, माहणु रे हिता रा प्रतिनिधित्व कितेया जे केसी वर्गा रा नीं हा, जेसरा कोई वास्तविक अस्तित्व नीं हा, जे कल्हा हवाई दार्शनिक कल्पनालोका रा प्राणी हा।
इने जर्मन समाजवादे, जिने स्कूली बच्चे रे साहीं आपणे मामूली कार्यभारा जो इतनी संजीदगी होर सत्यनिष्ठा सौगी ग्रहण कितेया था होर आपणी “फीके पकवाना वाल़ी ऊच्ची दूकाना” रा ढंढोरा पिटेया था, सुले-सुले आपणी पाण्डित्यपूर्ण मासूमियत खोई दिती।
अभिजात वर्ग होर निरंकुश राजतन्त्रा रे ख़िलाफ़ जर्मन बुर्जुआ वर्ग, होर खास तौरा ले प्रशियाई बुर्जुआ वर्गा रा संघर्ष-दूजे शब्दा बिच, उदारवादी आन्दोलन-ज्यादा गम्भीर बणी गया।
एताले “सच्चे” समाजवादियां जो चिरवांछित ये मौका मिल्या भई राजनीतिक आन्दोलना रे सामहणे स्यों आपणी समाजवादी मांगा रखो; उदारवाद, प्रतिनिधिमूलक सरकार, बुर्जुआ होड़, बुर्जुआ प्रेस स्वातन्त्रय, बुर्जुआ कानून, बुर्जुआ स्वतन्त्रता होर समानता, बगैरा जो परम्परागत लानता भेजो होर जनसाधारणा जो दसो भई एस बुर्जुआ आन्दोलना के तिन्हौ कोई फायदा नीं हा, बल्कि नुकसान हे नुकसान हुणा। जर्मन समाजवादे बडे मौके पर ये गल्ल भूली दिती भई फ्रांसिसी मीमांसा, जेतारी से एक बेहूदा प्रतिध्वनि मात्र था, आधुनिक बुर्जुआ समाजा रे अस्तित्व री, तेसरे अस्तित्वा री तदनुरूप आर्थिक परिस्थितियां री होर तेता रे अनुरूप ढलिरे राजनीतिक विज्ञाना री, यानि ठीक तिन्हा चीजा री पूर्वकल्पना करूआं चलहाईं,जेतारी प्राप्ती जर्मनी मंझ अजही तका चलीरे अनिर्णीत संघर्ष रा लक्ष्य थी।
निरंकुश सरकारा जो, तिन्हारे पादरियां, प्रोफेसरे, देहाती रईसा होर नौकरशाहा जो खतरनाक बुर्जुआ वर्गा री जबरदस्त बढ़ता जो रोकणे रा एस समाजवादा रे रूपा मंझ एक मनचाहा हौआ मिली गया।
हण्टरा होर गोलियां री कौड़ी ख़ुराका रे बाद, जे इन्हें सरकार तेस बक्त जर्मनी रे विद्रोही मजदूरौ पियाई थी, ये आखरा बिच दिती गयी एक मीठी गोल़ी थी।
एस तरहा के जिथी ये “सच्चा” समाजवाद जर्मन बुर्जुआ वर्गा रे खिलाफ लड़ाई मंझ सरकारा रा अस्त्र बणी गया, तिथी हे प्रत्यक्ष रूपा के तिने एक प्रतिक्रियावादी हित, जर्मन कूपमण्डूका रे हिता रा प्रतिनिधित्व कितेया। जर्मनी मंझ निम्न-बुर्जुआ वर्ग हे, जे सोल़वीं शताब्दी रा एक अवशेष हा होर तधी ले बारम्बार विभिन्न रूप धारण करीके प्रगट हुंदा रैहीरा, तिथी री वर्तमान अवस्था रा वास्तविक सामाजिक आधार हा।
एस वर्गा जो बरकरार रखणा जर्मनी री वर्तमान अवस्था जो बरकरार रखणा हा। बुर्जुआ वर्गा रा औद्योगिक होर राजनीतिक प्रभुत्व, एकी बखौ ता पूँजी रे संकेन्द्रणा के होर दूजी बखौ क्रान्तिकारी सर्वहारा वर्गा रे उदय के, तेसरे निश्चित विनाशा रा ख़तरा पैदा करहां। लगहां था भई “सच्चा” समाजवाद एकी हे तीरा के इन्हा दोन्हों चिड़ियां जो ख़त्म करी देंघा। यानि “सच्चा” समाजवाद एकी महामारी साहीं फैल्ही गया।
जर्मन समाजवादियें आपणे करूणाजनक “शाश्वत सत्य” री ठठरी जो जेबे कल्पनामय भावा रे झीने आवरणा बिच लपेटेया, एस आवरणा मंझ आलंकारिक भाषा रूपी फूलदार सलमा-सितारेयां री कसीदाकारी किती, होर एता जो रूग्ण भावुकता रे नीहार-जला बिच भिगोई के बाज़ारा मंझ ली आये, ता फेरी क्या कैहणा था, एहड़े खरीदारा रे बीच तेसरे एस माला री ख़ूब खपत हुई।
होर आपणी बखा ले जर्मन समाजवादे निम्न-बुर्जुआ कूपमण्डूका रे आडम्बरपूर्ण प्रतिनिधि हुणे रे आपणे पेशे जो ज्यादा ले ज्यादा स्वीकार कितेया।
जर्मन समाजवादियें घोषणा किती भई जर्मन राष्ट्र हे आदर्श राष्ट्र हा होर जर्मनी रा तुच्छ कूपमण्डूक हे आदर्श मानव हा। एस आदर्श मानवा री हर अरपाधपूर्ण नीचता री तिन्हें एक रहस्यमय, उच्च, समाजवादी व्याख्या किती-असलियता ले बिल्कुल विपरीत व्याख्या। आखरा बिच ता स्यों कम्युनिज्मा री “पाशविक विनाशकारी” प्रवृति रा सीधा-सीधा विरोध करने री पराकाष्ठा तका पौहंची गए। जर्मनी मंझ आजकाले (1847) समाजवादी होर कम्युनिस्ट साहित्य रे नावां ले जिन्हा चीज़ा रा प्रचार हुई करहां, तिन्हां बिच बौहत थोहड़े जो छाड़ी के बाक़ी सभ एस हे गन्दे होर क्षयकारी साहित्य री कोटि बिच आवहां।*
• 1848 री क्रान्तिकारी आन्धीए एस पूरी लीचड़ प्रवृति रा सफाया करी दितेया होर तिन्हारे समर्थका री समाजवादा बिच टांग अड़ाणे री इच्छा दूर करी दिती। एसा प्रवृति रे मुख्य होर क्लासिकी प्रतिनिधि श्री कार्ल ग्रून हे। (1890 रे जर्मन संस्करणा बिच एंगेल्सा री टिप्पणी)
(II) रूढ़िवादी या बुर्जुआ समाजवाद
बुर्जुआ वर्गा रा एक हिस्सा समाजा री बुराइयां जो इधी कठे दूर करना चाहां ताकि बुर्जुआ समाजा जो बरकरार रखाया जाई सके।
अर्थशास्त्री, परोपकारी, मानवतावादी, श्रमजीवी वर्गा री हालत सुधारणे रे आकांक्षी, ख़ैरात बांडणे वाल़े प्रबन्धक, पशु-रक्षा समितियां रे सदस्य, दारूबन्दी रे दीवाने, हरेक कल्पनीय प्रकारा रे छोटे-मोटे सुधारक – सभ एसा श्रेणी बिच आवहाएं। एतारे अलावा, एस तरहा रे समाजवादा रा एक सम्पूर्ण पद्धति रे रूपा बिच विशदीकरण तका करी दितेया जाहां।
समाजवादा रे एस रूपा रे उदाहरणा रे रूपा मंझ आसे प्रूदों री कताब (दरिद्रता रा दर्शन) जो लैई सकहाएं।
बुर्जुआ समाजवादी आधुनिक सामाजिक अवस्थावां रा पूरा लाभ चकणा चाहें, पर आधुनिक व्यवस्थावां मंझ अनिवार्यतः पैदा संघर्षा होर ख़तरेयां ले दूर रैही के ही। स्यों मौजूदा सामाजिक व्यवस्था जो चाहें, पर बगैर तेतारे क्रान्तिकारी होर विघटनशील तत्वा के ही। स्यों चाहें भई बुर्जुआ वर्ग हो, पर सर्वहारा नीं हो। बुर्जुआ वर्ग जेसा दुनिया मंझ सर्वेसर्वा हा स्वभावतः से तेसा दुनिया जो सर्वश्रेष्ठ मनहां; बुर्जुआ समाजवाद एसा सुखद अवधरणा जो कमोबेश एक सम्पूर्ण पद्धित रा रूप देई देहां। इधी कठे बुर्जुआ समाजवादी लोक जेबे सर्वहारा ले ये अपेक्षा करहाएं भई तिन्हां एस तरहा री पद्धति क़ायम करणी होर ऐहडा करीके सीधे नौवें यरूशलमा पौहंची जाणा ता दरअसल स्यों ये अपेक्षा करहाएं भई सर्वहारा वर्ग वर्तमान समाजा री सीमावां रा उल्लंघन नी करे होर बुर्जुआ वर्गा रे बारे बिच आपणी सभ घृणापूर्ण भावनावां जो तिलांजलि देई दे।
एस समाजवादा रा एक दूजा, ज्यादा व्यवहारिक पर कम व्यवस्थित रूप से हा जे हरेक क्रान्तिकारी आन्दोलना जो मज़दूर वर्गा री दृष्टि मंझ ये दसुआं गिराणा चाहां भई तेजो राजनीतिक सुधारा के नीं, बल्कि जीवना री भौतिक अवस्थावां, आर्थिक सम्बन्धा मंझ परिवर्तना के हे कोई लाभ हुई सकहां। पर जीवना री भौतिक अवस्थावां मंझ परिवर्तना ले एस समाजवादा रा मतलब ये कदापि नीं हा भई उत्पादना री पूँजीवादी पद्धतियां जो खत्म करी दितेया जाए, जेतौ क्रान्ति रे ज़रिये हे खत्म कितेया जाई सकहां, बल्कि तेतारा मतलब इन्हां सम्बन्धा पर आधारित प्रशासकीय सुधारा ले हा, यानि एहड़े सुधारा ले जे केसी हालता मंझ पूँजी होर श्रमा रे सम्बन्धा मंझ परिवर्तन नीं ल्याउंदे होर ज़्यादा ले ज़्यादा बुर्जुआ सरकारा रा खर्च कम करी देहाएं होर तेसरे प्रशासकीय कामा जो कुछ सरल बणाई देहाएं।
बुर्जुआ समाजवाद पर्याप्त अभिव्यक्ति तेबे होर सिर्फ तेबे हे प्राप्त करहां जेबे से कल्हे भाषा रा एक अलंकार बणी जाहां।
मुक्त व्यापार: मज़दूर वर्गा री भलाई कठे। संरक्षण शुल्कः मज़दूर वर्गा री भलाई कठे। जेल सुधारः मज़दूर वर्गा री भलाई कठे। बुर्जुआ समाजवादा रा ये हर्फ-आखरी हा, बस ये हे एक हर्फ हा जे से संजीदगी के मनहां।
तेसरा लुब्बे लुबाब एस मुहावरे मंझ हाः बुर्जुआ, बुर्जुआ हा मज़दूर वर्गा री भलाई कठे।
(III) आलोचनात्मक-कल्पनावादी समाजवाद होर कम्युनिज़्म
इथी आसे बाब्येफ़ होर दूजे लेखका री कृतियां री तरहा रे तेस साहित्य री चर्चा नीं करदे लगीरे जिने हरेक महान आधुनिक क्रान्ति मंझ सर्वहारा वर्गा री मांगा हमेशा मुखरित कितिरी।
आपणे वर्गा लक्ष्यां जो हासिल करने कठे सर्वहारा री पैहली सीधी-सीधी कोशिशा सार्वभौमिक उतेजना रे काला मंझ किती गई थी, जेबे सामन्ती समाजा रा तख़्ता पलटेया जाई करहां था। सर्वहारा री तेस बक्ता री अविकसित अवस्था रे करूआं होर सौगी हे तेसरी मुक्ति कठे जरूरी आर्थिक अवस्थावां रे अभावा रे करूआं - तिन्हां अवस्थावां रे करूआं, जिन्हा अजही उत्पन्न हुणा था होर ज्यों आसन्न बुर्जुआ युगा द्वारा हे उत्पन्न हुई सकहाईं थी – इन्हां कोशीशा रा असफल हुणा अनिवार्य था। सर्वहारा वर्गा रे इन्हां प्रथम आन्दोलना रे सौगी-सौगी जे क्रान्तिकारी साहित्य सृजित हुआ, तेतारा अनिवार्यतः प्रतिक्रियावादी चरित्र था। तिने सार्वभौमिक वैराग्य होर भोंडे रूपा मंझ सामाजिक बराबरी री भावनावां पैदा किती।
सेण्ट सीमों, फूरिये, ओवेन होर दूजे लोका री पद्धतियां रा जन्म – जिन्हौ असलियता मंझ समाजवादी होर कम्युनिस्ट पद्धतियां बोल्या जाई सकहां था – सर्वहारा होर बुर्जुआ वर्गा रे संघर्षा रे उपरोक्त आरम्भिक अविकसित काला मंझ हुआ था।
एता बिच सन्देह नीं हा भई इन्हां पद्धतियां रे संस्थापक तत्कालीन सामाजिक व्यवस्था मंझ वर्ग विरोध होर विघटनशील तत्वा री क्रिया जो देखाहें थे। पर तिन्हारी दृष्टि मंझ सर्वहारा, जे अजही आपणे शैशव काला मंझ था, एहड़ा वर्ग था जेता मंझ ना ता ऐतिहासिक पेशक़दमी थी होर ना हे स्वतन्त्र राजनीतिक आन्दोलना री कोई क्षमता थी।
चूंकि वर्ग विरोधा रा विकास उद्योगा रे विकासा रे सौगी क़दम मिलाई के चलहां, इधी कठे स्यों तेस बक्त जेहड़ी आर्थिक स्थिति पाहें, से अजही तिन्हौ सर्वहारा री मुक्ति रे कठे जरूरी अवस्थावां प्रदान नीं करदी। इधी कठे स्यों इन्हां अवस्थावां जो उत्पन्न करने मंझ समर्थ नौवें सामाजिक विज्ञाना री, नौवें सामाजिक नियमा री तलाश करहाएं।
स्यों चाहें भई ऐतिहासिक क्रिया री जगहा तिन्हारी व्यक्तिगत आविष्कारक विद्या लेई लौ; इतिहासा द्वारा सृजित सर्वहारा री मुक्ति री अवस्थावां रा काम तिन्हारी कल्पित अवस्थावां पूरा करी देयो; सर्वहारा रे सुले-सुले होर स्वतः पैदा हुणे वाल़े वर्ग संगठना रा काम इन्हा आविष्कारका द्वारा खास तौरा ले आविष्कृत एक समाज संगठन करी देयो। तिन्हारी दृष्टि मंझ भावी इतिहास तिन्हारी सामाजिक योजनावां रे प्रचार होर तिन्हारे व्यावहारिक क्रियान्वयना रा औज़ार मात्र बणी के रैही जाहां।
आपणी योजनावां तैयार करदे बक्त, तिन्हौ सर्वाधिक पीड़ित वर्ग हुणे रे नाते सभी ले ज़्यादा मज़दूर वर्गा रे हिता रा ख़्याल रैहां। तिन्हारी दृष्टि मंझ सर्वहारा रे अस्तित्वा रा कल्हा एक हे अर्थ हा – सर्वाधिक पीड़ित वर्ग।
वर्ग संघर्षा री अविकसित अवस्था होर आपणे परिवेशा रे करूआं एस तरहा रे समाजवादी आपणे जो सभ वर्ग विरोधा ले बौहत ऊपर समझाएं। समाजा रे हरेक सदस्य री, सभी थे ज़्यादा सम्पन्न सदस्यां री बी हालता जो स्यों बेहतर बनाणा चाहें। इधी कठे स्यों आदतन वर्ग भेदा रा लिहाज़ किते बिना पूरे समाजा ले या एहड़ा बोला भई ख़ास तौरा पर शासक वर्गा ले अपील करहाएं। स्यों सोचहाएं भई भला एहड़ा किहां हुई सकहां जे तिन्हारी प्रणाली जो एकी बारी समझी लैणे ले बाद लोक ये नी देखो भई से समाजा री यथासम्भव सर्वश्रेष्ठ व्यवस्था रे कठे यथासम्भव सर्वश्रेष्ठ योजना ही?
इधी कठे, सभ राजनीतिक, होर ख़ास तौरा ले क्रान्तिकारी कार्रवाइयां जो स्यों ठुकराई देहाएं। आपणे उद्देश्या जो स्यों शान्तिमय तरीकेयां ले हासिल करना चाहें, होर छोटे-छोटे प्रयोगा रे जरिये, जिन्हारी असफलता अवश्यम्भावी ही, होर नमूने रे ज़ोरा के स्यों आपणे नवीन सामाजिक दिव्य-सन्देशा कठे मार्ग प्रशस्त करने री कोशीश करहाएं।
भावी समाजा रे यों हवाई चित्र, ज्यों एहड़े बक्ता बिच बणाये जाहें जेबे सर्वहारा वर्ग अजही बौहत अविकसित दशा मंझ हुआं होर तेसरी स्वयं आपणी हे स्थिति रे बारे मंझ एक अत्यन्त काल्पनिक धारणा हुआईं, समाजा रे आम पुनर्निमाणा री तेसरी पैहली नैसर्गिक आकांक्षावां के मेल खाहें।
पर इन्हां समाजवादी होर कम्युनिस्ट प्रकाशना मंझ आलोचना रा बी एक तत्व रैहां। स्यों वर्तमान समाजा रे हरेक सिद्धान्ता पर प्रहार करहाएं। इधी कठे मज़दूर वर्गा रे प्रबोधना कठे तिन्हारे अन्दर अत्यन्त मूल्यवान सामग्री मौजूद रैहाईं। तिन्हां बिच भावी समाजा रे बारे मंझ जे बी अमली तजवीज़ा पेश किती गईरी – भई शैहर होर देहाता रा फ़र्क मटाई दितेया जाये, परिवारा री प्रथा रा, अलग-अलग माहणुआं रे निजी फ़ायदे कठे उद्योग चलाणे री पद्धति रा होर मज़दूरी व्यवस्था रा अन्त करी दितेया जाये, सामाजिक सामंजस्य री स्थापना किती जाये, राज्य री क्रिया रा कल्हे उत्पादना रे निरीक्षणा मंझ रूपान्तरण कितेया जाये – यों सभ तजवीज़ा तिन्हा वर्गा विरोधा री समाप्ति री दिशा बखौ इंगित करहाईं जे तेस बक्त भड़कदे लगे थे होर ज्यों इन्हां प्रकाशना मंझ कल्हे आपणे सभी ले प्रारम्भिक, अस्पष्ट होर अपरिभाषित रूपा मंझ अभिव्यक्त हुईरे। इन्हां तजवीज़ा रा स्वरूप, इधी कठे, विशुद्ध काल्पनिक हा।
आलोचनात्मक-कल्पनावादी समाजवाद होर कम्युनिज़्मा रा महत्व इतिहासा रे विकास क्रमा रे सौगी घटदा जाहां। आधुनिक वर्ग संघर्ष जिहां-जिहां बधहां होर निश्चित आकार ग्रहण करहां, तिहां-तिहां एस संघर्ष ले दूर खड़े रैहणे री बेतुकी स्थिति रा, एस संघर्षा रा विरोध करने री बेतुकी गल्ला रा सारा व्यावहारिक महत्व होर सैद्धान्तिक औचित्य बी ख़त्म हुंदा जाहां। फलतः हालांकि इन्हा पद्धतियां रे संस्थापक बौहत गल्ला मंझ क्रान्तिकारी थे, तेबे बी तिन्हारे शिष्ये हमेशा प्रतिक्रियावादी संकीर्ण गुट हे बणाइरे। सर्वहारा रे प्रगतिशील ऐतिहासिक विकास ले विपरीत स्यों आपणे गुरूआं रे मूल विचारा के चिपकीरे। इधी कठे स्यों हमेशा वर्ग संघर्षा जो चेतनाशून्य करने होर विरोधी वर्गा मंझ मेल-मिलाप करवाणे री कोशिश करहाएं। स्यों अजही बी आपणी काल्पनिक सामाजिक व्यवस्थावां जो प्रयोगत्मक रूपा मंझ चरितार्थ करने, इक्के-दूक्के “फालांस्तर” खड़े करने, “गृह-उपनिवेश” (होम-कॉलौनी) स्थापित करने, एक नौवीं “छोटी इकारिया”*- नौवें यरूशलमा रा जेबी संस्करण – क़ायम करने रे सुपने देखाहें, होर इन्हां सभ हवाई किलेयां जो अमली शक्ल देणे कठे स्यों बुर्जुआ वर्गा री भावनावां होर तिन्हारी थैलियां रा आश्रय लैणे जो मजबूर हुआएं। सुले-सुले यों लोक बी प्रतिक्रियावादी रूढ़िवादी समाजवादियां री जमाता मंझ पौहंची जाहें, जिन्हारा ऊपर चित्रण कितेया गईरा। अन्तर कल्हा इतना रैहां भई तिन्हारी अपेक्षा इन्हारा पाण्डित्य ज़्यादा व्यवस्थित हुआं होर स्यों आपणे सामाजिक विज्ञाना री चमत्कारिक शक्ती मंझ कट्टर होर मूढ़ग्राही विश्वास रखाहें।
इधी कठे, मज़दूर वर्गा री हर राजनीतिक कार्रवाई रा स्यों प्रचण्ड विरोध करहाएं। तिन्हारे मुताबिक एहड़ी कार्रवाइयां कल्हे नौवें दिव्य-सन्देशा मंझ अन्ध अविश्वासा रा हे परिणाम हुई सकहाईं।
इंग्लैण्डा मंझ ओवेनपन्थी चार्टिस्टा रा, होर फ्रांसा बिच फूरियेपन्थी सुधारवादियां रा विरोध करहाएं ज्यों आपणे विचार “ला रिफ़ार्मा” मंझ प्रस्तुत करहाएं।
• “फालांस्तेर” शार्ल फूरिये री योजना पर आधारित समाजवादी बस्तियां थी; “इकारिया” काबे आपणी कल्पना-नगरी (यूटोपिया) जो होर बादा बिच अमरीका री आपणी कम्युनिस्ट बस्ती जो बी दितेया गया नावं था। (1888 रे अंग्रज़ी संस्करणा मंझ एंगेल्सा री टिप्पणी)
ओवेन आपणे आदर्श कम्युनिस्ट समाजा जो “गृह-उपनिवेश” (होम-कॉलौनी) बोल्हाएं थे। “फालांस्तेर” फूरिये कल्पित सार्वजनिक प्रासादा जो दितेया गया नावं था। “इकारिया” तिन्हा कल्पना-देशा जो दितिरा नावं था, जेतारी कम्युनिस्ट संस्थावां जो काबे चित्रित कितेया था। (1890 रे जर्मन संस्करणा बिच एंगेल्सा री टिप्पणी)।
4. विभिन्न विरोधी पार्टियां रे सम्बन्धा बिच कम्युनिस्टा रा रूख़
दूजे अध्याया बिच मज़दूर वर्गा री वर्तमान काला री पार्टियां रे सौगी, जिहां इंग्लैण्डा मंझ चार्टिस्टा रे सौगी होर अमेरिका बिच कृषि सुधारका रे सौगी, कम्युनिस्टा रा सम्बन्ध सपष्ट कितेया जाई चुकीरा।
कम्युनिस्ट मज़दूरा रे तात्कालिक लक्ष्यां कठे लड़हाएं, तिन्हारे सामयिक हिता री रक्षा कठे प्रयत्न करहाएं पर वर्तमाना रे आन्दोलन मंझ स्यों एस आन्दोलना रे भविष्य रा बी प्रतिनिधित्व करहाएं होर तेतारा ध्यान रखाएं। फ्रांसा मंझ रूढ़िवादी होर आमूल परिवर्तनवादी बुर्जुआवां रे खिलाफ कम्युनिस्ट समाजवादी जनवादियां* रे सौगी एका कायम करहाएं पर एहड़ा करदे हुए स्यों महान क्रान्ति रे दिना ले परम्परागत रूपा मंझ चली आउंदी लफ्फाज़ी होर भ्रान्तियां रे प्रति आलोचना रा रूख़ अपनाणे रे आपणे अधिकारा जो सुरक्षित रखाहें।
स्विटज़रलैण्डा मंझ स्यों आमूल परिवर्तनवादियां रा समर्थन करहाएं पर एस गला जो भुलाए बिना भई ये पार्टी परस्पर-विरोधी तत्वा रे मेला के बणीरीः कुछ ता एता मंझ फ्रांसीसी किस्मा रे जनवादी समाजवादी हे होर कुछ उग्र परिवर्तनवादी बुर्जुआ।
• तेस बक्त एसा पार्टी रा प्रतिनिधित्व संसदा मंझ लेद्रु-रोलें, साहित्य मंझ लूई ब्लाँ होर दैनिक पत्रा मंझ ला रिफ़ार्म करहां था। सामाजिक-जनवादा रा नावं एतारे आविष्कारका रे अनुसार जनवादी होर गणतन्त्रवादी पार्टी रे तेस हिस्से रा द्योतक था, जे कमोबेश समाजवादा रे रंगा मंझ रंघिरा था। (1888 रे अंग्रेज़ी संस्करणा मंझ एंगेल्सा री टिप्पणी)।
फ्रांसा मंझ तेस बक्त जे पार्टी आपणे जो समाजवादी-जनवादी बोल्हाईं थी, तेतारा प्रतिनिधित्व राजनीतिक जीवना मंझ लेद्रु-रोलें होर साहित्य मंझ लूई ब्लाँ करहाएं थे; एस तरहा के स्यों आजा रे जर्मन सामाजिक-जनवादा ले बिल्कुल हे भिन्न पार्टी थी। (1890 रे जर्मन संस्करणा मंझ एंगेल्सा री टिप्पणी)
पोलैंडा मंझ स्यों तेसा पार्टी रा समर्थन करहाएं जे कृषि क्रान्ति जो राष्ट्रीय आज़ादी री पैहली शर्त मनहाईं होर जेसे 1846 मंझ क्रैको विद्रोहा री आग सुलगाई थी।
जर्मनी मंझ तिथी रा बुर्जुआ वर्ग जिथी तका क्रान्तीकारी ढंगा के कार्रवाई करहां, तिथी तका स्यों तेसरे सौगी मिली के निरंकुश राजतन्त्र, सामन्ती भूस्वामियां होर निम्न बुर्जुआ रे खिलाफ़ लडहाएं।
पर स्यों मज़दूर वर्गा जो सर्वहारा होर बुर्जुआ वर्गा रे शत्रुतापूर्ण विरोधा रा यथासम्भव सपष्टा ले सपष्ट बोध करवाणे रा काम, क्षणा भरा कठे बी नीं रोकदे, ताकि जर्मन मज़दूर तिन्हां सामाजिक होर राजनीतिक अवस्थावां जो, जिन्हौ बुर्जुआ वर्ग आपणे प्रभुत्वा रे सौगी अनिवार्यतः लागू करघा, फौरन बुर्जुआ वर्गा रे विरूद्ध, हथियारा रे रूपा मंझ इस्तेमाल करना शुरू करी सके, ताकि जर्मनी मंझ प्रतिक्रियावादी वर्गा रे पतना ले बाद स्वयं बुर्जुआ वर्गा रे खिलाफ़ तुरन्त हे लड़ाई री शुरूआत हुई जाए।
जर्मनी री बखौ कम्युनिस्ट ख़ास तौरा पर इधी कठे ध्यान देहाएं भई ये देश एहड़ी बुर्जुआ क्रान्ति रे दरवाजे पर खड़ीरा जे अनिवार्यतः यूरोपीय सभ्यता री ज़्यादा उन्नत अवस्थावां मंझ, होर इंग्लैण्डा री सताहरवीं शताब्दी होर फ्रांसा री अठाहरवीं शताब्दी री तुलना मंझ, एक ज्यादा उन्नत सर्वहारा जो लेई के सम्पन्न हुणी; होर इधी कठे जर्मनी री ये बुर्जुआ क्रान्ति एता बाद तुरन्त हे हुणे वाल़ी सर्वहारा क्रान्ति री पूर्वपीठिका हुणी।
संक्षेपा मंझ, कम्युनिस्ट सर्वत्र मौजूदा सामाजिक होर राजनीतिक व्यवस्था रे खिलाफ़ हर क्रान्तिकारी आन्दोलना रा समर्थन करहाएं।
इन्हां सभ आन्दोलना मंझ स्यों प्रमुख प्रश्ना रे रूपा मंझ सम्पत्ति रे प्रश्ना जो, चाहे तेस बक्त तेतारा जेस अंशा मंझ बी विकास हुईरा हो, सर्वोपरि स्थान देहाएं।
आखरा बिच, स्यों सर्वत्र देशा री जनवादी पार्टियां रे बीच एकता होर समझौता करवाणे री कोशिश करहाएं।
कम्यूनिस्ट आपणे विचारौ और उद्देश्या को छिपाणा आपणी शाना रे खिलाफ समझाएं। स्यों खुलेआम एलान करहाएं भई तिन्हारे लक्ष्य पूरी वर्तमान सामाजिक व्यवस्था जो बलपूर्वक उलटुआं हे सिद्ध किते जाई सकहाएं। कम्युनिस्ट क्रान्ति रे भया ले शासक वर्गा जो कांबणे देया। सर्वहारा बाले गुआणे कठे आपणी जंजीरा रे सिवाए कुछ नीं हा। जीतणे कठे तेसरे साम्हणे सारी दुनिया ही।
दुनिया रे मज़दूरो, एक हो।
मार्क्स होर एंगेल्सा द्वारा दिसम्बर,1847-जनवरी, 1848 मंझ लिखित। पैहले-पैहल लन्दना मंझ फ़रवरी, 1848 मंझ जर्मना मंझ प्रकाशित।
(राहुल फाउण्डेशन, लखनऊ, ले हिन्दी बिच छपीरी पुस्तिका "कम्युनिस्ट पार्टी का घोषणा पत्र" रा मण्डयाली अनुवाद)
