रामनगर महल्ले री सैर (मंडयाली लेख-11)
आपणी सांझकणी सैरा जो जारी रखणे कठे मेरे अंदरा ले भारी दबाब हा। दरअसल इन्हा सैरा के मेरा मंडयाली बिच लिखणे रा जे क्रम शुरू हुइरा हाउं तेता जो रोकणा नीं चाहंदा। इधी कठे नी जे भई मुंजो मंडयाली लिखणे ले कुछ मिलणे री उम्मीद ही। बल्कि मुंजो लगहां भई ये मेरे शैहरा होर प्रदेशा रा मेरे परा एक कर्जा हा जे मुंजो हे चुकाणा पौणा। अगर हाउं कुछ लिखणा-पढणा सिखी गईरा ता मुंजो तेसा भाषा बिच बी से लिखणा चहिए जे मेरी जिंदगी रा हिस्सा हा। मुंजो लगहां भई मंडयाली बिच लिखुआं हाउं ज्यादा धरातला परा जाई के अभिव्यक्त करी सकहां। इधी कठे सांझकणी सैरा रे कठे आपु जो मानसिक रूपा के तैयार करी के हाउं कई बार टलणे बाद आखिरकार चली हे पौहां। सुकेता (सुंदरनगरा) ले आउणे वाली सुकेती खाड पुलघराटा बाले मंडी शैहरा पौंहचाईं। पुलघराटा ले पाडला रे पुराणे पुला तक सुकेती खाडा रे पुठे हाथा बखौ रामनगर महल्ला बसीरा। खाडा ले टारना पहाडी रे उपरा तका ये महल्ला फैलीरा। पुराणे सुकेती पुल्हा से सौगी हे विश्वकर्मा रा मंदर होर हाल बणीरा। ये हाल शैहरा बिच हुणे करूआं शादी-ब्याह, क्रार्यक्रमा होर मिटिंगा कठे प्रयोग हुआं। मंदर रे सौगी हे एक बायं ही। पर ऐसा बाईं री हालत बडी खराब हुई गईरी। होर जल्दी थे जल्दी ये प्राकृतिक जल स्त्रोत ठीक कितया जाणा चहिए। रामनगर महल्ले बिच सभी थे महत्वपुर्ण स्थल बरसेला मॉनुमैंट है। ये स्मारक 1637 ई. ले बादा रे मंडी रे इतिहासा पर बडी महत्वपूर्ण जानकारी देहां। जेबे मंडी रे राजे गुजरी जाहें थे ता तिन्हा री राणियां होर खवासियां बी तिन्हा के सती हुई जाहीं थी। इन्हा राजेयां सौगी राणियां और खवासियां रे सती हुणे री याद जिउंदी रखणे कठे पाथरा रे स्तंभ बनाए जाहें थे।
बरसेला स्मारक मंडी रे इतिहासा जो दसहां। ऐस स्मारका रा महत्व देखदे हुए भारतीय पुरातत्व विभागा वालेयां ये आपणे नियंत्रणा बिच लेई लीतीरा। रामनगरा जो जाणे वाली सडका रे चौका बाले ले पुठे हाथा बखौ एक गली हेठा बखौ उतरुआं ऐस स्मारका बाले पुजहाएं। ये गली अग्गे जाईके तहसीला बाले मिलहाईं। चौका पर एस स्मारका जो दर्शाणे कठे कोई बी बोर्ड नहीं लगीरा जेता के पता चलो भई एस स्मारका जो देखणेओ जाणे कठे रस्ता किन्हुए हा। विभागा जो सडका पर बोर्ड लगाई के एस स्थल रा महत्व होर रस्ता ठीक ढंगा के दसणा चहिए। रामनगर महल्ला मंडी ले सुंदरनगरा बखौ जाणे वाली पुराणी सडका रे उपर होर हेठली बखौ बसीरा। पहले शिमले चंडीगढा बखौ एस सडका ले हे जाहें थे। बाईपास बणने ले ऐस सडका पर ट्रैफिका री मार थोडी कम हुईरी। पर अझे बी ट्रैफिका रा हाल ये हा भई सडक कम चौडी हुणे करूआं कई बार जाम लगीरा रैहां। प्रशासन ऐभे ऐस सडका जो वन वे करने री योजना पर काम करी करहां। एसा सडका रे दोनो बखौ रामनगरा रा बाजार हा। एस महल्ले री सभी थे बडी खासियत ये ही भई इथी सभी धर्मा रे लोग मिलीजुली कने रैहाएं। इहां ता इथी मंडी रे लोक बी पुराणे जमाने ते बसीरे पर इथी ज्यादातर आबादी बादा बिच बाहरा ले आईरे अल्पसंख्यक समुदाया री ही।
रामनगरा सिख धर्म रे नामधारी होर नीलधारी लोग ज्यादा रैहाएं। मंगवाईं महल्ले री शुरूआता बिच हे होटल किंगसिटी होर दो-तीन होटल हे। इथी हे जीबे भाई री दुकान ही। जीवा कांग्रेसा रे नेता हा होर कई साला ले मंत्री अनिल शर्मा के जुडीरा। इन्हा री चाही री दुकाना भ्यागा ले हे राजनिती री गपशप शुरू हुई जाहीं। नारायण सिंह मेरा क्लासफेलो हुआं था आजकाले बाहर रैहां। इन्हा री कुल्फियां री फैक्टरी मुंजो अझी बी याद ही। बचपना बिच फुटबाल खेलुआं आउणे बाद नारायण, काला होर तिन्हा रा छोटा भाई चुपचाप कुल्फियां निकालुआं सारी टीमा जो खवाहें थे। नारायणा रे घरा पारा बखौ हरिशु होरी रा घर हा। इन्हा रे पिता जी के बी आसारी बडी दोस्ती ही। रिशु आसारे वक्ता बिच फुटबाला रा सभी थे शानदार खिलाडी रैहा। रिशुए आपणे फुटबाला रे कैरियरा बिच देश रे लगभग सारे नामीगिरामी फुटबाल टीमा के मैच खेलीरे। आजकाले हरिशे आपणे घरा उपरा बखौ स्पोर्टसा री दुकान पाईरी। हरिशु रा भाई जीतू आजकाले फुटबाला रे कोचा री नौकरी करहां। हरिशा री दुकाना अगे विक्रम पठानिया (बावे) होरी री दुकान ही। बावा बी मंगवाईं महल्ले रा फुटबाल प्लेयर रैहीरा। बावे री दुकाना उपरा बखौ एडवोकेट कमल सैणी होरी रा घर हा। एडवोकेट कमल सैणी वकालता रे सौगी-2 फोटोग्राफी रा शौक बी रखाहें। आजकाले इन्हा रे खीचीरे फोटो काफी पसंद किते जाई करहाएं। बावे री दुकाना रे थोडी अग्गे रामनगरा रे पुर्व पार्षद अवनिंदर सिंह होरी री दुकान ही। इन्हा री दुकाना सामणे मनीष दुग्गल होरिये आपणी नौवीं दुकान बनाईरी। इथी हे थोडी दूर अगे हैस्बी गन फैक्टरी ही। ऐता रे सौगी हे सुरेश शर्मा, हरिसिंह, रणिया होर भागी री दुकान ही। मंगवाई महल्ले बिच कई सरकारी दफ्तर हे। सडका रे हेठा बखौ एक लिंक तहसीला जो जाहां। तहसीला रे भवना बिच आबकारी काराधान होर पर्यटन विभागा रे दफ्तर बी हे। जबकि पाडल, रामनगर, टारना होर भगवाहन महल्ले रे पटवारियां रे दफ्तर बी इथी हे। तहसीला सौगी हे विजिलेंस एंड एंटी करप्शना रे एसपी रा दफ्तर हा। जबकि नबी रे सौहरे सक्सेना होरी रे घरा एनसीबी रा दफतर हा। इथी ले बरसेले बखौ जाणे वाली गली बिच तहसीलदार होर कर्मचारियां रे क्वाटर हे। बरसेले रे नेडे हे फुटबाला रे खेला बिच मंडी रा नावं रोशन करने वाले कई खिलाडियां रे घर हे। जिन्हा बिच सुनील भाई, सोमा भाई, छोटु भाई, (नीनी होर नीटी) भाई, लाला भाई होर सुरेश भाई बगैरा। इधी ले अलावा बी रामनगरा बिच फुटबाल, क्रिकेट होर बाकी खेल खेलणे वालेयां री एक लंबी फेहरिस्त ही। जिन्हा बिच आसे जस्सी भाई, सतीश, डीडी, रूपलाल, सुभाष, रोशन, भागी, सुरेश, महेश, राजेन्द्र, भोला भाई, कुकु भाई, मिंटु होर टाईगरा होरी रा नावं लेई सकहाएं। तहसीला ले उपरा बखौ एक गली नाले रे सौगी-2 कुमी राम होर एडवोकेट इन्द्रा होरी रे घरा बखौ जाहीं। तहसीला अग्गे विख्यात गुलेरिया एडवोकेटा होरी रा घर हा। ऐते अगे कोर्टा रे क्रिमिनल एहलमद राकु भाई होरी रा घरा हा। सामहणे नंबरदार तारा सिंह सरदारा होरी रा घर हा। ऐता रे सौगी हे सामणे बखौ नगर परिषदा रा शौचालय हा। पर देखरेखा रे बगैर ये काम नीं करी करदा। हालांकि ऐता जो बनाणे कठे कमेटिए कई लाख रूपये रा खर्चा कितीरा। इथी हे एक पुराणा पीपल हा। ऐता ले हेठा बखौ पशु चिकित्सालय हा। जबकि उपरा बखौ जाणे वाले सडक एडीजे साहब होर सीजेएम साहब रे रैजीडैंसा जो जाहीं। ऐसा हे सडका पर अग्गे प्रेस क्लब मंडी रा भवन हा। हालांकि प्रेस क्लबा रे ऐस भवन ले कई गतिविधियां चली सकहाईं पर फिलहाल क्लबा री गतिविधियां पुरी तरहा के ठप्प पईरी। सरकारा जो क्लब रे सौगी वाली जमीन क्लब जो देई के इथी रा समुचित प्रयोग करना चहिए। पीपला रे अगे पंडत ब्रदर्जा री दुकाना ही। एते अग्गे भानू पठानिया भाई होरी री बर्फा री फैक्टरी ही। भानू भाई रे पिता जी मेरे दादा जो आपणा गुरू मनहाएं थे। अझी तका इन्हा रा परिवार आसारे परिवारा के गुरू-शिष्या वाला रिश्ता मनुआं आसा के मिलहाएं होर बरताएं। भानू भाई रे घरा रे सामहणे नामधारी धर्मशाला ही।
इथी तडके ले हे नामधारी समुदाय रे लोका रा पौंहचणा शुरू हुई जाहां। इथी ले थोडा अग्गे जस्सी भाई, भोला भाई और कुकु भाई रा घर होर तिन्हा री बीरी सिंह एंड सन गन फैक्टरी ही। इथी हे सामहणे रणिया भाई आटो रिपेयरा री दुकान करहाएं। सौगी हे टाइगर भाई रा घर बी हा। ऐते थोडी अगे ले एक सडक जिला पंचायत अधिकारी रे दफ्तरा जो जाहीं। जबकि सडका ले हेठा बखौ जाणे वाले गली बिच प्रसिध पत्रकार बीरबल शर्मा होरी रा घर हा। बीरबल शर्मा एक ऐहडी शख्शियत हे जिन्हे लगभग सारे प्रदेशा री यात्रा करी कने पहाडा रा जन जीवन आपणे कैमरे बिच समेटी लीतीरा। इन्हा री एनएच-21 पर बिंद्रावणी हिमाचल दर्शन आर्ट गैलरी बिच यों सारी पिक्चरा लोका रे प्रदर्शन कठे रखीरी। ऐसा गैलरी रे माध्यमा ले लोका जो एकी हे छता थाल्हे पूरे प्रदेशा रे दर्शन चित्रा रे माध्यमा के हुई जाहें। बीरबल शर्मा होरी रे घर सौगी हे आसारे दोस्त राकेश (राकू) भाई होरी रा घर हा। राकू भाई आजकाले स्कूला रे लैक्चरार हे लगीरे। इन्हा रे घरा मेरा बचपना ले आउणा जाणा हा। राकू भाई सौगी आसे कई नाटका बिच काम कीतीरा। साहित्यिक रूचि वाले राकू भाई अझी बी नाटका बिच अभिनय करहाएं होर स्कूला रे बच्चेयां जो बी नाटक तैयार करवाहें। इथी ले थोडा अगे चलणे पर रामनगर महल्ले री मोती मस्जिद आवाहीं।
इहां ता मंडी हमेशा सभी धर्मा रा समभाव बणीरा रैहां। पर कई बार कुछ घटना रा फायदा चकी के सांप्रदायिक लोक धार्मिक असहिष्णुता फैलाहें होर आदमी जो आदमी रा दुश्मन बनाई देहाएं। मुंजो याद ही भई कुछ साल पैहले बाहरी राज्य ले आईरे मुहम्मद मरगुब नावां रे एकी दर्जी रा काम करने वाले मठे कोटली री मठी के प्रेम प्रसंगा बिच तेसा पर भरी बसा बिच तेजाब सटी दितेया था। जेता री प्रतिक्रिया बिच सांप्रदायिक लोके रामनगर होर जेलरोडा री मस्जिदा पर हमला करीके इन्हा जो नुकसान पहुंचाणे री कोशीश किती थी। जेता के दोनों धर्मा बिच नफरता री खाई खोदणे रा काम हुआ था। पर तेता ले बाद कोई भी ऐहडी घटना नी हुई जेता के सांप्रदायिक माहौल बणया हो। थोडा दूर चलणे पर नीलधारी समुदाय रा गुरूद्वारा श्री दुख निवारण साहिब आवहां। गुरूद्वारे बिच दिन भर शब्द कीर्तना रा माहौल रैहां। सिख लोक आपणे गुरूआं रे प्रकाशोत्सव होर विभिन्न त्योहारा रे मौकेयां जो खूब धूमधामा के मनाहें। इथी हे सौगी लगदा रंगारंग सिंह पत्रकारा होरी रा घर हा। रंगरंग सिंह होरी रे पिता जी विश्वेश्वर सिंह होरी बौहत सुलझी रे इंसान हे। रंगा होरी रे बडे भाई सुक्खा भाई जी कांग्रेसा रे नेता हे। सुक्खा भाई आजकाले नगर परिषद मंडी रे मनोनीत पार्षद हे। नीलधारी गुरूद्वारे ले थोडा अग्गे कैहनवाल चौक आवां।
कैहनवाल चौका पर झीरू मियां होरी रा घर हा। कैहनवाल रोडा पर दैनिक जागरणा रे ब्युरो चीफ विनोद भावुका होरी रा क्वाटर हा। भावुक जी मेरे अभिन्न मित्र हे। ध्याडे रा ज्यादातर वक्त आसारा कठे हे गुजरां। पत्रकार होणे रे सौगी-2 स्यों सोसल एक्टिविस्ट होर साहित्यकार बी हे। भावुक जी आजकाले कांगडी बिच बडी अच्छी कविता लिखी करहाएं। मेरे मंडयाली लिखणे पीछे बी इन्हा री हे प्रेरणा ही। इन्हा रे क्वाटरा मेरा अक्सर आउणा-जाणा लगीरा रैहां। कैहनवाला जो जाणे वाली सडका रे किनारे डीएफसी रा गोदाम हा। इथी हे एडवोकेट जी पी गुलेरिया होर एडवोकेट दुर्गा सिंह होरी रे घर हे। कैहनवाला जो जाणे वाली सडका ले एक लिंक रोड टारना बखौ आवां। इथी राजीव स्टुडियो वालेयां रे घरा बाले करीब दो दर्जन मकान हे। सौगी हे एक पुराणी बौवडी बी ही। ये सडक अगे जाई के माहुंनागा रे मंदरा बाले गट्टु रामा होरी रे घरा रे नजदीक निकलाहीं। इथी कांग्रेसी नेता एडवोकेट दीपक शर्मा होरी रा घर बी हा। कैहनवाल चौका पर हे मेहर भवन हा। इथी रे नारायण सिंह होरी, बच्ची भाई, बॉबी भाई, रिकी, डान भाई होर सारे परिवारा के आसारे परिवारा रे पुराणे संबंध हे। इथी ले अग्गे सडका रे उपरा बखौ हे घर बसीरे जबकि खाडा बखौ कमेटी वालेयां जंगला लगाई दितीरा। थोडी दूर अग्गे अशोका फर्नीचरा रा शोरूम हा। सामणे मोनाल होटल हा। इथी हे आसारे भगवाहन महल्ले ले गइरे हरजिंदर बिल्ला होर पप्पे होरी री चाही री दुकान ही। थोडा दूर चली के पुलघराटा रा पेट्रोल पंप आवां। पुलघराटा ले एक सडक बाईपासा जो चली जाहीं होर एक रामनगरा जो आवाहीं। पुलघराटा टारना रे पार्षद होर रामनगरा रे पुर्व पार्षद योगराज होरी रा घर हा। पुलघराटा रामनगर महल्ला खत्म हुई जाहां होर इथी ले हाउं वापस हटणा शुरू करी देहां। ऐस वक्त न्यारा हुई गईरा होर पुलघराटा रे चौका पर कमेटी री कोई स्ट्रीट लाईट नीं भखीरी। पुलघराटा ले अशोका फर्नीचरा रे शो रूमा तक कोई लाईट प्वाईँट नीं जलणे रे करुआं घुप्प न्यारा पईरा। इथी होटला री लाईटा के थोडा परयासा हा। इथी ले मेहर भवना तक बी कोई लाईट नी ही। मेहर भवन ले अगे हाउं स्ट्रीट लाईटा चैक करदा लगहां तो मुंजो महामृत्युंजय चौका तक करीब दो दर्जन लाईट प्वाईंट लगीरे मिलहाएं। पर हैरानी री गल ये रैही भई करीब 50 फुटा री दूरी पर लगीरे इन्हा प्वाइंटा मंझा ले एकी बी खंबे बिच लाईट नीं भखीरी थी। हैरानी री गल ये बी ही भई ऐस महल्ले कई अधिकारी होर जिम्मेवार लोक रैहाएं पर इथी री लाईटा रे कठे कोई नीं सोचदा। इधी ले पैहले रामनगरा री सडका री हालत बी बडी खस्ता थी। कुछ वक्त पैहले ये ठीक ता किती थी पर भी खराब हुई गईरी कई जगहा ले। रामनगर महल्ले री सांझकणी सैरा ले ऐहडा सामहणे आया भई प्रशासना जो महल्ले रे ऐतिहासिक स्थल बरसेले रे बारे बिच उचित जगहा पर जानकारी देणी चहिए। महल्ले रे नालेयां री चैनलाईजेशन करना चहिए। प्राकृतिक स्त्रोत बचाणे चहिए, बिजली री हालत ठीक करनी चहिए होर सडका ठीक किती जाणी चहिए। इधी ले अलावा बी बौहत सारी समस्या महल्ले वालेयां री हुई सकाहीं। जेता कठे आसारे प्रतिनिधियां जो लोका ले जानकारी मांगी के तिन्हा रे हे सहयोगा के सुलझाणी चहिए। फिलहाल आज की सैरा बिच इतना हे बाकि रैही गईरी गल्ला अगली बार करघे। तेबे तका तुसारा धन्यावाद...
बरसेला स्मारक मंडी रे इतिहासा जो दसहां। ऐस स्मारका रा महत्व देखदे हुए भारतीय पुरातत्व विभागा वालेयां ये आपणे नियंत्रणा बिच लेई लीतीरा। रामनगरा जो जाणे वाली सडका रे चौका बाले ले पुठे हाथा बखौ एक गली हेठा बखौ उतरुआं ऐस स्मारका बाले पुजहाएं। ये गली अग्गे जाईके तहसीला बाले मिलहाईं। चौका पर एस स्मारका जो दर्शाणे कठे कोई बी बोर्ड नहीं लगीरा जेता के पता चलो भई एस स्मारका जो देखणेओ जाणे कठे रस्ता किन्हुए हा। विभागा जो सडका पर बोर्ड लगाई के एस स्थल रा महत्व होर रस्ता ठीक ढंगा के दसणा चहिए। रामनगर महल्ला मंडी ले सुंदरनगरा बखौ जाणे वाली पुराणी सडका रे उपर होर हेठली बखौ बसीरा। पहले शिमले चंडीगढा बखौ एस सडका ले हे जाहें थे। बाईपास बणने ले ऐस सडका पर ट्रैफिका री मार थोडी कम हुईरी। पर अझे बी ट्रैफिका रा हाल ये हा भई सडक कम चौडी हुणे करूआं कई बार जाम लगीरा रैहां। प्रशासन ऐभे ऐस सडका जो वन वे करने री योजना पर काम करी करहां। एसा सडका रे दोनो बखौ रामनगरा रा बाजार हा। एस महल्ले री सभी थे बडी खासियत ये ही भई इथी सभी धर्मा रे लोग मिलीजुली कने रैहाएं। इहां ता इथी मंडी रे लोक बी पुराणे जमाने ते बसीरे पर इथी ज्यादातर आबादी बादा बिच बाहरा ले आईरे अल्पसंख्यक समुदाया री ही।
रामनगरा सिख धर्म रे नामधारी होर नीलधारी लोग ज्यादा रैहाएं। मंगवाईं महल्ले री शुरूआता बिच हे होटल किंगसिटी होर दो-तीन होटल हे। इथी हे जीबे भाई री दुकान ही। जीवा कांग्रेसा रे नेता हा होर कई साला ले मंत्री अनिल शर्मा के जुडीरा। इन्हा री चाही री दुकाना भ्यागा ले हे राजनिती री गपशप शुरू हुई जाहीं। नारायण सिंह मेरा क्लासफेलो हुआं था आजकाले बाहर रैहां। इन्हा री कुल्फियां री फैक्टरी मुंजो अझी बी याद ही। बचपना बिच फुटबाल खेलुआं आउणे बाद नारायण, काला होर तिन्हा रा छोटा भाई चुपचाप कुल्फियां निकालुआं सारी टीमा जो खवाहें थे। नारायणा रे घरा पारा बखौ हरिशु होरी रा घर हा। इन्हा रे पिता जी के बी आसारी बडी दोस्ती ही। रिशु आसारे वक्ता बिच फुटबाला रा सभी थे शानदार खिलाडी रैहा। रिशुए आपणे फुटबाला रे कैरियरा बिच देश रे लगभग सारे नामीगिरामी फुटबाल टीमा के मैच खेलीरे। आजकाले हरिशे आपणे घरा उपरा बखौ स्पोर्टसा री दुकान पाईरी। हरिशु रा भाई जीतू आजकाले फुटबाला रे कोचा री नौकरी करहां। हरिशा री दुकाना अगे विक्रम पठानिया (बावे) होरी री दुकान ही। बावा बी मंगवाईं महल्ले रा फुटबाल प्लेयर रैहीरा। बावे री दुकाना उपरा बखौ एडवोकेट कमल सैणी होरी रा घर हा। एडवोकेट कमल सैणी वकालता रे सौगी-2 फोटोग्राफी रा शौक बी रखाहें। आजकाले इन्हा रे खीचीरे फोटो काफी पसंद किते जाई करहाएं। बावे री दुकाना रे थोडी अग्गे रामनगरा रे पुर्व पार्षद अवनिंदर सिंह होरी री दुकान ही। इन्हा री दुकाना सामणे मनीष दुग्गल होरिये आपणी नौवीं दुकान बनाईरी। इथी हे थोडी दूर अगे हैस्बी गन फैक्टरी ही। ऐता रे सौगी हे सुरेश शर्मा, हरिसिंह, रणिया होर भागी री दुकान ही। मंगवाई महल्ले बिच कई सरकारी दफ्तर हे। सडका रे हेठा बखौ एक लिंक तहसीला जो जाहां। तहसीला रे भवना बिच आबकारी काराधान होर पर्यटन विभागा रे दफ्तर बी हे। जबकि पाडल, रामनगर, टारना होर भगवाहन महल्ले रे पटवारियां रे दफ्तर बी इथी हे। तहसीला सौगी हे विजिलेंस एंड एंटी करप्शना रे एसपी रा दफ्तर हा। जबकि नबी रे सौहरे सक्सेना होरी रे घरा एनसीबी रा दफतर हा। इथी ले बरसेले बखौ जाणे वाली गली बिच तहसीलदार होर कर्मचारियां रे क्वाटर हे। बरसेले रे नेडे हे फुटबाला रे खेला बिच मंडी रा नावं रोशन करने वाले कई खिलाडियां रे घर हे। जिन्हा बिच सुनील भाई, सोमा भाई, छोटु भाई, (नीनी होर नीटी) भाई, लाला भाई होर सुरेश भाई बगैरा। इधी ले अलावा बी रामनगरा बिच फुटबाल, क्रिकेट होर बाकी खेल खेलणे वालेयां री एक लंबी फेहरिस्त ही। जिन्हा बिच आसे जस्सी भाई, सतीश, डीडी, रूपलाल, सुभाष, रोशन, भागी, सुरेश, महेश, राजेन्द्र, भोला भाई, कुकु भाई, मिंटु होर टाईगरा होरी रा नावं लेई सकहाएं। तहसीला ले उपरा बखौ एक गली नाले रे सौगी-2 कुमी राम होर एडवोकेट इन्द्रा होरी रे घरा बखौ जाहीं। तहसीला अग्गे विख्यात गुलेरिया एडवोकेटा होरी रा घर हा। ऐते अगे कोर्टा रे क्रिमिनल एहलमद राकु भाई होरी रा घरा हा। सामहणे नंबरदार तारा सिंह सरदारा होरी रा घर हा। ऐता रे सौगी हे सामणे बखौ नगर परिषदा रा शौचालय हा। पर देखरेखा रे बगैर ये काम नीं करी करदा। हालांकि ऐता जो बनाणे कठे कमेटिए कई लाख रूपये रा खर्चा कितीरा। इथी हे एक पुराणा पीपल हा। ऐता ले हेठा बखौ पशु चिकित्सालय हा। जबकि उपरा बखौ जाणे वाले सडक एडीजे साहब होर सीजेएम साहब रे रैजीडैंसा जो जाहीं। ऐसा हे सडका पर अग्गे प्रेस क्लब मंडी रा भवन हा। हालांकि प्रेस क्लबा रे ऐस भवन ले कई गतिविधियां चली सकहाईं पर फिलहाल क्लबा री गतिविधियां पुरी तरहा के ठप्प पईरी। सरकारा जो क्लब रे सौगी वाली जमीन क्लब जो देई के इथी रा समुचित प्रयोग करना चहिए। पीपला रे अगे पंडत ब्रदर्जा री दुकाना ही। एते अग्गे भानू पठानिया भाई होरी री बर्फा री फैक्टरी ही। भानू भाई रे पिता जी मेरे दादा जो आपणा गुरू मनहाएं थे। अझी तका इन्हा रा परिवार आसारे परिवारा के गुरू-शिष्या वाला रिश्ता मनुआं आसा के मिलहाएं होर बरताएं। भानू भाई रे घरा रे सामहणे नामधारी धर्मशाला ही।
इथी तडके ले हे नामधारी समुदाय रे लोका रा पौंहचणा शुरू हुई जाहां। इथी ले थोडा अग्गे जस्सी भाई, भोला भाई और कुकु भाई रा घर होर तिन्हा री बीरी सिंह एंड सन गन फैक्टरी ही। इथी हे सामहणे रणिया भाई आटो रिपेयरा री दुकान करहाएं। सौगी हे टाइगर भाई रा घर बी हा। ऐते थोडी अगे ले एक सडक जिला पंचायत अधिकारी रे दफ्तरा जो जाहीं। जबकि सडका ले हेठा बखौ जाणे वाले गली बिच प्रसिध पत्रकार बीरबल शर्मा होरी रा घर हा। बीरबल शर्मा एक ऐहडी शख्शियत हे जिन्हे लगभग सारे प्रदेशा री यात्रा करी कने पहाडा रा जन जीवन आपणे कैमरे बिच समेटी लीतीरा। इन्हा री एनएच-21 पर बिंद्रावणी हिमाचल दर्शन आर्ट गैलरी बिच यों सारी पिक्चरा लोका रे प्रदर्शन कठे रखीरी। ऐसा गैलरी रे माध्यमा ले लोका जो एकी हे छता थाल्हे पूरे प्रदेशा रे दर्शन चित्रा रे माध्यमा के हुई जाहें। बीरबल शर्मा होरी रे घर सौगी हे आसारे दोस्त राकेश (राकू) भाई होरी रा घर हा। राकू भाई आजकाले स्कूला रे लैक्चरार हे लगीरे। इन्हा रे घरा मेरा बचपना ले आउणा जाणा हा। राकू भाई सौगी आसे कई नाटका बिच काम कीतीरा। साहित्यिक रूचि वाले राकू भाई अझी बी नाटका बिच अभिनय करहाएं होर स्कूला रे बच्चेयां जो बी नाटक तैयार करवाहें। इथी ले थोडा अगे चलणे पर रामनगर महल्ले री मोती मस्जिद आवाहीं।
इहां ता मंडी हमेशा सभी धर्मा रा समभाव बणीरा रैहां। पर कई बार कुछ घटना रा फायदा चकी के सांप्रदायिक लोक धार्मिक असहिष्णुता फैलाहें होर आदमी जो आदमी रा दुश्मन बनाई देहाएं। मुंजो याद ही भई कुछ साल पैहले बाहरी राज्य ले आईरे मुहम्मद मरगुब नावां रे एकी दर्जी रा काम करने वाले मठे कोटली री मठी के प्रेम प्रसंगा बिच तेसा पर भरी बसा बिच तेजाब सटी दितेया था। जेता री प्रतिक्रिया बिच सांप्रदायिक लोके रामनगर होर जेलरोडा री मस्जिदा पर हमला करीके इन्हा जो नुकसान पहुंचाणे री कोशीश किती थी। जेता के दोनों धर्मा बिच नफरता री खाई खोदणे रा काम हुआ था। पर तेता ले बाद कोई भी ऐहडी घटना नी हुई जेता के सांप्रदायिक माहौल बणया हो। थोडा दूर चलणे पर नीलधारी समुदाय रा गुरूद्वारा श्री दुख निवारण साहिब आवहां। गुरूद्वारे बिच दिन भर शब्द कीर्तना रा माहौल रैहां। सिख लोक आपणे गुरूआं रे प्रकाशोत्सव होर विभिन्न त्योहारा रे मौकेयां जो खूब धूमधामा के मनाहें। इथी हे सौगी लगदा रंगारंग सिंह पत्रकारा होरी रा घर हा। रंगरंग सिंह होरी रे पिता जी विश्वेश्वर सिंह होरी बौहत सुलझी रे इंसान हे। रंगा होरी रे बडे भाई सुक्खा भाई जी कांग्रेसा रे नेता हे। सुक्खा भाई आजकाले नगर परिषद मंडी रे मनोनीत पार्षद हे। नीलधारी गुरूद्वारे ले थोडा अग्गे कैहनवाल चौक आवां।
कैहनवाल चौका पर झीरू मियां होरी रा घर हा। कैहनवाल रोडा पर दैनिक जागरणा रे ब्युरो चीफ विनोद भावुका होरी रा क्वाटर हा। भावुक जी मेरे अभिन्न मित्र हे। ध्याडे रा ज्यादातर वक्त आसारा कठे हे गुजरां। पत्रकार होणे रे सौगी-2 स्यों सोसल एक्टिविस्ट होर साहित्यकार बी हे। भावुक जी आजकाले कांगडी बिच बडी अच्छी कविता लिखी करहाएं। मेरे मंडयाली लिखणे पीछे बी इन्हा री हे प्रेरणा ही। इन्हा रे क्वाटरा मेरा अक्सर आउणा-जाणा लगीरा रैहां। कैहनवाला जो जाणे वाली सडका रे किनारे डीएफसी रा गोदाम हा। इथी हे एडवोकेट जी पी गुलेरिया होर एडवोकेट दुर्गा सिंह होरी रे घर हे। कैहनवाला जो जाणे वाली सडका ले एक लिंक रोड टारना बखौ आवां। इथी राजीव स्टुडियो वालेयां रे घरा बाले करीब दो दर्जन मकान हे। सौगी हे एक पुराणी बौवडी बी ही। ये सडक अगे जाई के माहुंनागा रे मंदरा बाले गट्टु रामा होरी रे घरा रे नजदीक निकलाहीं। इथी कांग्रेसी नेता एडवोकेट दीपक शर्मा होरी रा घर बी हा। कैहनवाल चौका पर हे मेहर भवन हा। इथी रे नारायण सिंह होरी, बच्ची भाई, बॉबी भाई, रिकी, डान भाई होर सारे परिवारा के आसारे परिवारा रे पुराणे संबंध हे। इथी ले अग्गे सडका रे उपरा बखौ हे घर बसीरे जबकि खाडा बखौ कमेटी वालेयां जंगला लगाई दितीरा। थोडी दूर अग्गे अशोका फर्नीचरा रा शोरूम हा। सामणे मोनाल होटल हा। इथी हे आसारे भगवाहन महल्ले ले गइरे हरजिंदर बिल्ला होर पप्पे होरी री चाही री दुकान ही। थोडा दूर चली के पुलघराटा रा पेट्रोल पंप आवां। पुलघराटा ले एक सडक बाईपासा जो चली जाहीं होर एक रामनगरा जो आवाहीं। पुलघराटा टारना रे पार्षद होर रामनगरा रे पुर्व पार्षद योगराज होरी रा घर हा। पुलघराटा रामनगर महल्ला खत्म हुई जाहां होर इथी ले हाउं वापस हटणा शुरू करी देहां। ऐस वक्त न्यारा हुई गईरा होर पुलघराटा रे चौका पर कमेटी री कोई स्ट्रीट लाईट नीं भखीरी। पुलघराटा ले अशोका फर्नीचरा रे शो रूमा तक कोई लाईट प्वाईँट नीं जलणे रे करुआं घुप्प न्यारा पईरा। इथी होटला री लाईटा के थोडा परयासा हा। इथी ले मेहर भवना तक बी कोई लाईट नी ही। मेहर भवन ले अगे हाउं स्ट्रीट लाईटा चैक करदा लगहां तो मुंजो महामृत्युंजय चौका तक करीब दो दर्जन लाईट प्वाईंट लगीरे मिलहाएं। पर हैरानी री गल ये रैही भई करीब 50 फुटा री दूरी पर लगीरे इन्हा प्वाइंटा मंझा ले एकी बी खंबे बिच लाईट नीं भखीरी थी। हैरानी री गल ये बी ही भई ऐस महल्ले कई अधिकारी होर जिम्मेवार लोक रैहाएं पर इथी री लाईटा रे कठे कोई नीं सोचदा। इधी ले पैहले रामनगरा री सडका री हालत बी बडी खस्ता थी। कुछ वक्त पैहले ये ठीक ता किती थी पर भी खराब हुई गईरी कई जगहा ले। रामनगर महल्ले री सांझकणी सैरा ले ऐहडा सामहणे आया भई प्रशासना जो महल्ले रे ऐतिहासिक स्थल बरसेले रे बारे बिच उचित जगहा पर जानकारी देणी चहिए। महल्ले रे नालेयां री चैनलाईजेशन करना चहिए। प्राकृतिक स्त्रोत बचाणे चहिए, बिजली री हालत ठीक करनी चहिए होर सडका ठीक किती जाणी चहिए। इधी ले अलावा बी बौहत सारी समस्या महल्ले वालेयां री हुई सकाहीं। जेता कठे आसारे प्रतिनिधियां जो लोका ले जानकारी मांगी के तिन्हा रे हे सहयोगा के सुलझाणी चहिए। फिलहाल आज की सैरा बिच इतना हे बाकि रैही गईरी गल्ला अगली बार करघे। तेबे तका तुसारा धन्यावाद...
समीर कश्यप
13-10-2013
sameermandi.blogspot.com
No comments:
Post a Comment