जेलरोडा री सैर

मंडयाली लेख-3

जेलरोडा री सैर

जेहडा जे नावां ले हे पता लगहां मंडी शहरा रे वार्ड नंबर तीन जेलरोडा री सभी थे बडी खासियत इथी बणीरी उप जेल ही। ये जेल हिमाचला री सभी थे पुराणी जेलहा मंझा ले एक ही। मंडी शहरा रे दक्षिण हिस्से बीच रिवालसर, कोटली, जालंधर जाणे वाली सडका रे दोनों बखौ बसीरा ये महल्ला सुकोडी खाड्डा रे पुलहा ले शुरू हुआं होर पीडब्लयुडी रे दफतरा बाले रे पीपला तका रे नाले रे वारली बखौ तका फैली रा। हालांकि महल्ले बिच पुराणी आबादी भी बडी संख्या बिच रैंही पर इथी बहुत सारे नौवें मकान भी बणी गईरे। जगहा भतेरी हुणे रे करूआं इथी बौहत सारे दफ्तर होर सरकारी क्वाटर हे। प्रशासना रे बडे अफसरा रे क्वाटर, पीडब्यलु डी रा दफ्तर, वर्कछाप, नगर नियोजना रा दफ्तर, डीओ रा दफ्तरा, एजुकेशन विभागा री कलौनी रे अलावा उप जेल मंडी, खादी बोर्ड दफ्तर बगैरा कई सरकारी दफ्तर होर क्वाटर ऐस महल्ले बिच बणीरे। जेलरोड सैर करने कठे बडा उपयुक्त महल्ला बोलया जाई सकां। बौहत सारे लोक भ्यागा-सांझा ऐस महल्ले बखौ निकली कने सैर कराहें। जेलरोडा री सैर बिच पहले ता मंडी शहरा री गिनी चुनी मस्जिदा मंझा ले एक मस्जिद देखणेयो मिलहाईं। ऐता रे सौगी हे मांडव हसपताल हा। जेलरोडा रा कुसुम थियेटर कई पीढियां री यादा रे अंदर समाई गईरा। जिथी तका मुंजो याद ही ता मैं आपणी जिंदगी बिच पहली फिल्म कुसुम थियेटरा हे देखी थी। आजकाले हालांकि जिथी तका मेरी आपणी गल्ल ही मैं ता फिल्मा देखणा होर सिनेमाहाला जो जाणा कई साला ले बंद करी दितीरा। पर फिल्मा देखणे वाले दर्शका री अझी बी एक बडी तादाद ही। लोक अजही बी तेहडा हे मजा लैहें फिल्मा देखणे रा जेहडा कधी आसे भी लैहें थे केसी जमाने बिच। जेलरोड मंडी ले रिवालसर होर कोटली जाणे वाली सडका रे दोनहो बखौ बसीरा। ऐस महल्ले बिच मंडी रे सौगी लगदे गांव तल्याहड, देवधार, कोटली, तुंगल होर धर्मपुरा तका रे लोके आपणे शानदार मकान बनाइरे। हालांकि लोका रे मकान सडका रे काफी उपरा तक बणी गईरे पर इन्हा घरा जो जाणे कठे सडक नी हुणे ले लोका जो बडी परेशानी उठाणी पौहांई। महल्ले वाले लंबे वकता ले इथी एंबुलैंस रोड बनाणे री मांग करी करहाऐं। पर अजही तका ऐस बारे बिच कोई कारवाई नी हुई पाईरी। सारे शहरा साहीं जेलरोडा बी पार्किंगा री समस्या ही। कुछ ध्याडे पैहले प्रशासना री तरफ ले ऐहडी कवायद शुरू हुई थी भई उपजेल मंडी बैहने जो बदली देणी होर ऐसा जगहा मल्टीप्लैक्स होर पार्किंग बनाणी। ऐस प्रोजेक्टा कठे कई होर बी दफ्तर इथी ले चकणे री प्लान थी। ऐहडा लगहां भई फिलहाल ये प्लान बी प्रशासने ठंडे बस्ते बिच पाई दितीरा। पर लोका री समस्या जिहां की तिहां बरकरार ही। हालांकि जेलरोडा री ये मेरी पैहली सैर होणे रे करूआं अजही महल्ले री समस्या रे बारे बिच ज्यादा कुछ नी बोली सकदा। पर मेरे दिमागा ऐहडा बिचार हा जे मां जिन्हुए-2 हाउं गुजरना होर जेहडा-2 देखणा से मां तुसा जो पुरी इमानदारी के दसणे री कोशीश करनी। जेलरोडा री कोटली सडक रे किनारे-2 चलदे हुए इहां तो तुसा जो कुछ खराबी नी सुझणी। पर दो दिन पहले हे सीवरेजा रा एक टैंक फटी जाणे ले सारी गंदगी चहुं बखा फैली गईरी। प्रशासन रे बडे बडे अधिकारी बी इन्हुए गुजरी कराहें थे पर केसिये बी टैंका जो ठीक करने री नी सोची। तेबे जाईके महल्ले रे हे एडवोकेट आकाश शर्मा होरिये ऐस बारे बिच प्रशासन होर मीडिया जो दसया। महल्ले वालेयां रा बोलणा हा भई इथी कई सीवरेजा रे टैंक लिक हुई रे होर कई फटी गईरे। महल्ले री सडका री कई जगह बुरी हालत ही। सिनेमाहाला रे पिछली सडक टुटी फुटी गईरी। तेहडी हे पीपला ले ताराचंदा होरी रे घरा जो जाणी वाली सडका री हालत बी खस्ता ही। महल्ले बिच लाईटा री व्यवस्था बी ठीक नीं। होर कई जगहा हमेशा रा हे न्यारा पईरा रैहां। खराब सडका होर न्यारे के हमेशा दुर्घटना हुणेरा अंदेशा बणीरा रैहां। खैर, ये मेरी जेलरोडा री सैर रा पहला चक्कर था। पहली बारी ता हाउं आपणे आपा जो इन्हा महल्लेयां री बनावट के हे अपडेट करी करहां। फिलहाल ता सभी थे बडा फायदा होर संतुष्टि मुंजो ऐस गल्ला ले मिली करहाईं जे मुंजो ऐहडी-2 जगहा देखणेओ मिली कराहीं जिथी मैं आपणे बचपना रा काफी टाईम बिताईरा। होर मुंजो ऐसा सैरा रे बहाने आपणे स्कूला, कालेजा रे दोस्त होर कई परिचिता के मिलणे रा मौका मिली करहां। आपणे क्लासफेलो लालू भाई के जेबे मिलया ता आपणे बचपना बिच पौहंची गया। ये सारा अनुभव बडा रोमांचित करने वाला है। धन्यावाद समीर कश्यप sameermandi@gmail.com